កណ្ដាល: បុរសម្នាក់ដេកខ្យល់គស្លាប់លើគ្រែក្រោមផ្ទះ បង្កការភ្ញាក់ផ្អើលដល់ក្រុមគ្រួសារនិងសមត្ថកិច្ច។

ហេតុការណ៍នេះបានកើតឡើងនៅវេលាម៉ោង៥ព្រឹក ថ្ងៃទី២៨ ខែមិថុនា ឆ្នាំ ២០១៧ ត្រង់ចំណុចលើគ្រែក្រោមផ្ទះជនរងគ្រោះស្ថិតនៅភូមិវាល ឃុំស្អាងភ្នំ ស្រុកស្អាង ខេត្តកណ្តាល។

ប្រភពព័ត៌មានបានឲ្យដឹងថា ជនរងគ្រោះមានឈ្មោះ ហ៊ុន ហៀន ភេទប្រុស អាយុ៤៩ឆ្នាំ ជនជាតិខ្មែរ មានទីលំនៅភូមិ វាល ឃុំស្អាងភ្នំ ស្រុកស្អាង ខេត្តកណ្តាល។

ប្រភពដដែលបានបន្តថា នៅមុនពេលកើតហេតុ យប់ថ្ងៃទី២៧ ខែមិថុន ឆ្នាំ២០១៧ ឈ្មោះ ហ៊ុន ហៀន បានហូបបាយជាមួយក្រុមគ្រួសារ ហើយក៏មកសម្រាន្តនៅលើក្រោមផ្ទះតែម្នាក់ឯងចំណែកឯប្រពន្ធសម្រាន្តនៅផ្ទះមួយទៀត(ផ្ទះចាស់)ដែលនៅខាងជើងគ្នា ឃ្លាតប្រហែល៥០ម៉ែត្រជាមួយកូនៗ លុះដល់ម៉ោង៥ព្រឹក នាថ្ងៃទី២៨ ខែមិថុនា ឆ្នាំ២០១៧ មានកូនស្រីឈ្មោះ ហឿន សុខហៀង អាយុ២០ឆ្នាំ បានដើរទៅក្រោមផ្ទះដាស់ឪពុកឲ្យក្រោកឡើង ប៉ុន្តែដាស់មិនភ្ញាក់ក៏ចាប់អង្រួនមើលទើបដឹងថាឪពុកខ្លួនបានស្លាប់ហើយ ពេលនោះក៏បានស្រែកហៅម្តាយនឹងបងប្អូនឲ្យមកមើល។

ក្រោយពីបានទទួលបានព័ត៌មានហើយ កម្លាំងជំនាញពិនិត្យហេតុស្រុក ប៉ុស្តិ៍ ក្រុមប្រឹក្សាឃុំ មេភូមិ ពេទ្យឃុំ ពិនិត្យសាកសព ពុំមានស្លាកស្នាមអ្វីគួរឲ្យកត់សម្គាល់ឡើយ។

ក្រោយពេលពិនិត្យរួចហើយ បានប្រគល់សពឲ្យក្រុមគ្រួសារធ្វើបុណ្យតាមប្រពៃណី៕