កណ្តាល: ជនសង្ស័យម្នាក់ ត្រូវបានកម្លាំងនគរបាលស្រុកពញាឭ ធ្វើការឃាត់ខ្លួន ក្រោយពីត្រួតពិនិត្យរកឃើញមានថ្នាំញៀននៅជាប់នឹងខ្លួន។

ការឃាត់ខ្លួននេះបានធ្វើឡើងកាលពីវេលាម៉ោង៨និង៣០នាទី យប់ថ្ងៃទី២៨ ខែមិថុនា ឆ្នាំ២០១៧ ស្ថិតនៅចំណុចផ្លូវជាតិ៥១ ភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្តាល។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួនបានខាងលើនេះមានឈ្មោះ ឆេង ម៉េងលី ភេទប្រុស អាយុ២០ឆ្នាំ មុខរបរនៅផ្ទះ ស្នាក់នៅភូមិម្លូម៉ឺន ឃុំផ្សារដែក ស្រុកពញាឮ ខេត្តកណ្តាល ។ ក្នុងនោះដែរ សមត្ថកិច្ចធ្វើការហូតបានវត្ថុតាងរួមមាន៖ ម្សៅក្រាមពណ៌សថ្លា មេតំហេ្វមីន ម៉ាទឹកកក ICE សង្ស័យសារធាតុញៀន៣កញ្ចប់តូច ,ទូរសព្ទ១គ្រឿងម៉ាក Nokia អិនចុចពិល, ដាវ១ដើម រួមនឹងឧបករណ៍ប្រើប្រាស់មួយចំនួន។

មុននឹងឈានដល់ការឃាត់ខ្លួនបានជនសង្ស័យខាងលើ កម្លាំងជំនាញអធិការដ្ឋាននគរបាលស្រុកពញាឭ ទទួលព័ត៌មានពីមហាជនល្អថាមានមុខសញ្ញាកំពុងជួញដូរ
សារធាតុញៀននៅចំណុចខាងលើកម្លាំងជំនាញបានចុះទៅបង្រ្កាបឃាត់ខ្លួនបានជនសង្ស័យខាងលើ រួមនឹងវត្ថុតាងតែម្តង។

នៅចំពោះមុខសមត្ថកិច្ចជនសង្ស័យខាងលើនេះបានសារភាពថា ថ្នាំញៀននេះ គឺខ្លួនបានយកទៅលក់ឲ្យគេនោះគឺទិញពីឈ្មោះបាន សាលី (ហៅឌាំង) ភេទប្រុស អាយុ ប្រហែល៣៤ឆ្នាំ ស្នាក់នៅភូមិទេពប្រណម្យ ឃុំវិហារលួង ស្រុកពញាឮ ខេត្តកណ្តាល ដោយបានការ ចូលរួមដោយក្រុមប្រឹក្សាឃុំ នាយប៉ុស្តិ៍រដ្ឋបាលមេភូមិ ឆែកឆេរកន្លែងជនសង្ស័យដេករកឃើញ ថ្នាំញៀន១កញ្ចប់,តូចដាវ១ និងកំប៉ុងទុកថ្នាំ១ ,ទុយោវាល់ថ្នាំ២ និងឧបករណ៍ប្រើប្រាស់មួយចំនួន បន្ថែមទៀត។

បច្ចប្បន្នជនសង្ស័យខាងលើ កំពុងត្រូវបានសមត្ថកិច្ចធ្វើការឃាត់ខ្លួននៅអធិការដ្ឋាននគរបាលស្រុកពញាឭ ដើម្បីកសាងសំណុំរឿងបញ្ជូនខ្លួនទៅកាន់អធិការដ្ឋាននគរបាលស្រុកពញាឭ ដើម្បីចាត់ការបន្តតាមផ្លូវច្បាប់បន្តទៀត៕