នៅទីបំផុតទៅ កាមេរ៉ា Canon 6D Mark II ដែលគេបានទន្ទឹងរងចាំជាយូរ ត្រូវបានប្រកាសចេញជាផ្លូវការហើយ នៅថ្ងៃម្សិលមិញនេះ ជាមួយការផ្លាស់ប្តូរលក្ខណ:​សម្បត្តិជាច្រើនផ្នែក លើកលែងតែសមត្ថភាពថតវីដេអូគុណភាពកម្រិត 4K ដែលអ្នកប្រើប្រាស់ភាគច្រើនចង់បានបំផុត។

Canon 6D ជំនាន់ទីពីរ​នេះ ពិតជាមានការកែប្រែយ៉ាងធំសម្បើម ធៀបទៅនឹងជំនាន់ដំបូងរបស់វា ដែលប្រកាសចេញក្នុងឆ្នាំ ២០១២។ វាបានពាំនាំមកជាមួយអង្គញាណកាមេរ៉ា CMOS ទំហំ ២៦.២ មេហ្គាភិចសែល CPU ជំនាន់ DIGIC 7 កម្រិត ISO ខ្ពស់ រហូតដល់ ៤០,០០០ ដែលអាចជួយសម្រួលដល់ការផ្តិតយករូបភាពក្នុងស្ថានភាពពន្លឺទាបបានយ៉ាងល្អប្រសើរ។

6D Mark II ក៏មានភ្ជាប់មកជាមួយផងដែរ នូវប្រព័ន្ធតាមចាប់រូបភាពល្បឿន​លឿន Dual Pixel ដ៏ទំនើបរបស់ក្រុមហ៊ុន Canon ដែលអាចថតផ្ចង់លើផ្ទៃរូបភាពបានរហូតដល់ទៅ ៤៥ ចំណុច ខណ: 6D បានតែ ១១ និងអាចថតរូបជាប់រដាស់ក្នុងល្បឿន ៦.៥ ប៉ុស្តិ៍/វិនាទី។

នៅផ្នែកខាងក្រោយ គឺមានបំពាក់អេក្រង់ LCD ប្រភេទប៉ះបញ្ជាទំហំ ៣ អីុញ ដែលអាចបត់ចេញមកចំហៀង និងបង្វិលចុះឡើងបាន។ មួយវិញទៀត វាក៏មានបំពាក់ខែលការពារអាកាសធាតុដូច 5D Mark IV និងប្រព័ន្ធ Wi-Fi, NFC, Bluetooth និង GPS Radio ផងដែរ។

Canon 6D Mark II នឹងចាប់ផ្តើមចែកចាយលក់នៅលើទីផ្សារចាប់ពីខែកក្កដា ខាងមុខ ជាមួយតម្លៃ ១,៩៩៩ ដុល្លារ (តម្លៃនៅបរទេស)៕

ប្រភពព័ត៌មាន: theverge