ភ្នំពេញៈ គ្រោះថ្នាក់ចរាចរណ៍មួយ បានកើតឡើងរវាងរថយន្តម៉ាក តាកូម៉ាមួយគ្រឿង បានបុកជាមួយនឹងរថយន្តម៉ាកព្រុស ដែលកំពុងបើកបរក្នុងល្បឿនលឿនដូចគ្នាពេញទំហឹង បណ្ដាលឲ្យរថយន្តទាំង២គ្រឿងរងការខូចខាតយ៉ាងដំណំ សំណាងល្អគ្មានអ្នករងរបួស។

ហេតុការណ៍នេះបានកើតឡើងកាលពីវេលាម៉ោង១ រំលងអាធ្រាតឈានចូលថ្ងៃទី ១ ខែកក្កដា ឆ្នាំ២០១៧ ស្ថិតនៅចំណុចផ្លូវបែកជាបួន ក្នុងសង្កាត់បឹងកេងកង១ ខណ្ឌចំការមន រាជធានីភ្នំពេញ។

យោងតាមប្រភពព័ត៌មានពីសាក្សីនៅកន្លែងកើតហេតុ បានឲ្យដឹងថា មុនពេលកើតហេតុគេឃើញ រថយន្តព្រុសមួយគ្រឿង ពាក់ស្លាកលេខ ភ្នំពេញ 2Q-7831 បើកដោយបុរសម្នាក់ និងនារីម្នាក់រួមដំណើរជាមួយ ក្នុងទិសដៅពីជើងទៅត្បូង ធ្វើដំណើរតាមបណ្ដោយផ្លូវលេខ ៥១ ខណៈដែលមកដល់ចំណុចកើតហេតុខាងលើ ក៏បុកជាមួយ រថយន្តមួយគ្រឿងទៀតមាក តាកូម៉ា ពាក់ស្លាកលេខ ភ្នំពេញ 2T-5711 បើកបរដោយបុរសម្នាក់ រួមដំណើរជាមួយបុរសម្នាក់ ធ្វើដំណើរតាមបណ្ដោយផ្លូវលេខ៣៦០ ក្នុងទិសដៅពីលិចទៅកើត លុះដល់ចំណុចផ្លូវបែកជាបួន រថយន្តទាំង២គ្រឿងក៏បានបុកគ្នាយ៉ាងពេញទំហឹង រងការខូចខាតទាំងសងខាង តែសំណាងល្អមិនបណ្ដាលអោយមនុស្សរងរបួសនោះទេ។

ក្រោយពេលកើតហេតុសមត្ថកិច្ចជំនាញបានចុះមកធ្វើការវាស់វែងរថយន្តទាំង ២គ្រឿងខាងលើយកទៅរក្សាទុកនៅករិយាល័យចរាចរណ៍ជើងគោកនៃស្នងការ ដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ តាមផ្លូវច្បាប់បន្តទៀត៕