ភ្នំពេញ: ជនសង្ស័យម្នាក់ ក្នុងចំណោមបក្ខពួក២នាក់ បានធ្វើសក្មមភាពឆក់ទូរសព្ទដៃពីបុរសម្នាក់ ដែលកំពុងជិះម៉ូតូនៅលើដងផ្លូវបានសម្រេច តែត្រូវបានប្រជាពលរដ្ឋឃើញទាន់ ស្រែកចោរៗដេញចាប់បានវាយទ្រោមខ្លួន រួចប្រគល់ជូនសមត្ថកិច្ច។ ចំណែកបក្ខពួកម្នាក់ទៀតរត់គេចខ្លួនបាត់ស្រមោល។

ហេតុការណ៍នេះកើតឡើងការពីវរលាម៉ោង៧និង១០នាទីយប់ ថ្ងៃទី៧ ខែកក្កដា ឆ្នាំ២០១៧ ស្ថិតនៅចំណុចការ៉ាស់សាំង តូតាល់ ស្តុបទីក្រុងបៃតង ក្នុងសង្កាត់ទឹកល្អក់២ ខណ្ឌទួលគោក រាជធានីភ្នំពេញ។

សមត្ថកិច្ចបានឲ្យដឹងថា ជនសង្សយ័ដែលឃាត់ខ្លួនបានខាងលើនេះមានឈ្មោះ សឿង សុភក្តិ ភេទប្រុស អាយុ១៨ឆ្នាំ មុខរបរជាងជួសជុលម៉ូតូ ស្នាក់សង្កាត់មានជ័យ ខណ្ឌមានជ័យ រាជធានីភ្នំពេញ ដោយមានស្រុក កំណើត នៅឃុំឧត្តមសូរិយា ស្រុកសំរោង ខេត្តតាកែវ ដកហូតបាន ទូរសព្ទដៃ IPhone6 មួយគ្រឿង។

នៅចំពោះមុខសមត្ថកិច្ច ជនសង្ស័យខាងលើបានសារភាពថា ខ្លួនបានធ្វើសកម្មភាពឆក់៤លើកមកហើយ ដោយ៣លើកបានសម្រេច។ ចំណែកលើកទី៤នេះ ត្រូវជាប់ខ្នោះសមត្ថកិច្ច។

យោងតាមប្រភព័ត៌ពីកន្លែងកើតហេតុ បានឲ្យដឹងថា មុនកើតហេតុ គេឃើញជនសង្ស័យ២នាក់ ជិះម៉ូតូមួយគ្រឿងម៉ាក និច ពណ៌ក្រហម គ្មានស្លាកលេខ ជិះតាមបណ្តោយផ្លូវលេខ១៨២ ទិសដៅពីកើតទៅលិច លុះមកដល់ចំណុចកើតហេតុ ស្រាប់តែបានធ្វើសកម្មភាពឆក់ទូរសព្ទដៃមួយគ្រឿងពីបុរសម្នាក់ ដែលកំពុងជិះម៉ូតូមួយគ្រឿង ម៉ាកឌ្រីមសេ១២៥ មិនចាំស្លាកលេខ ជិះនៅខាងមុខស្របទិសដៅគ្នាពីកើតទៅលិច ខណ:ដែលជនរងគ្រោះកំពុងនិយាយសៀតនៅនឹងមួកការពារ បានសម្រេច តែត្រូវបានប្រជាពលរដ្ឋឃើញហេតុការណ៍បាននាំគ្នាស្រែកថាចោរៗ និងដេញតាមធ្វើឲ្យជនសង្ស័យទាំង២នាក់ មានការភិតភ័យបានបើកម៉ូតូរត់គេច មកដល់ស្តុបសំណង់១២ បានផ្តួលម៉ូតូចោលហើយរត់គេចខ្លួនបាត់ស្រមោល។ ចំណែកអ្នកអង្គុយនៅពីក្រោយ ជាអ្នកឆក់បានរត់គេចខ្លួនមកដល់ហាងនំបុ័ង វិមានទិព្វ នៅក្បែកន្លែងកើតហេតុខាងលើ ត្រូវបានប្រជាពលរដ្ឋចាប់បាននាំគ្នាវាយមួយដៃមួយជើងឡើងទ្រមខ្លួន ទើបប្រគល់ជូនសមត្ថកិច្ច។ចំណែកជនរងគ្រោះបានជិះម៉ូតូបន្តដំណើរទៅមុខបាត់ស្រមោលមិនមកកន្លែងកើតហេតុនោះទេ។

បច្ចុប្បន្ន ជនសង្ស័យនិងវត្ថុតាងត្រូវបានសមត្ថកិច្ចបញ្ជូនខ្លួនមកសួរនាំនៅប៉ុស្តិ៍ទឹកល្អក់២និងបញ្ជូនបន្តទៅអធិការដ្ឋាន នគរបាលខណ្ឌទួលគោកដើម្បីសាងសំណំរឿងបញ្ជូនទៅតុលាការចាត់ការតាមនីតិវិធីច្បាប់៕