ភ្នំពេញៈ កម្លាំងសមត្ថកិច្ចអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យ ល្បាតក្នុងភូមិសាស្ត្រ បានធ្វើការឃាត់ខ្លួនបានជនសង្ស័យម្នាក់ រកឃើញថ្នាំញៀនចំនួន៨កញ្ចប់តូច។

ប្រតិបត្តិការណ៍នេះបានធ្វើឡើងកាលពីវេលាម៉ោង១១និង៣០នាទីយប់ ថ្ងៃទី៩ ខែកក្កដា ឆ្នាំ២០១៧ ស្ថិតនៅចំណុចផ្លូវលំ ភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ជនសង្ស័យដែលឃាត់ខ្លួនបានខាងលើនេះមានឈ្មោះ បញ្ញា ហេង អាយុ១៨ឆ្នាំ មុខរបរមិនពិតប្រាកដស្នាក់នៅភូមិថ្មគោល សង្កាត់ចោមចៅ ខណ្ឌពោធិ៍សែនជ័យ ។

មុននឹងឈានដល់ការឃាត់ខ្លួនបានជនសង្ស័យខាងលើ កម្លាំងសមត្ថកិច្ចអន្តរាគមន៍នៃអធិការដ្ឋាននគរបាលខណ្ឌពោធិ៍សែនជ័យបានជិះម៉ូតូល្បាត ក្នុងភូមិស្រាស្ត ដើម្បីទប់ស្កាត់បទល្មើសកុំឲ្យកើតមានឡើង។ លុះដល់ចំណុចកើតហេតុ ក៏ប្រទះឃើញជនសង្ស័យខាងលើកំពុងឈរ ជាមួយមនុស្សស្រីម្នាក់ទៀត ដោយកម្លាំងមានការសង្ស័យ ក៏បានឈប់ចុះដើម្បីសាកសួរ តែជនសង្ស័យបានប្រញាប់រត់បាត់អស់ម្នាក់ នៅតែសល់តែជនសង្ស័យម្នាក់ត្រូវកំលាំងឃាត់ខ្លួនបាន និងឆែកឆេររកឃើញម្សៅក្រាម ពណ៌សថ្លា ចំនួន៨កញ្ចប់ថង់តូច នៅនឹងខ្លួនរបស់ជនសង្ស័យទើបឃាត់ខ្លួននាំយកមកសាកសួរតែម្តង។

បច្ចុប្បន្នជនសង្ស័យរួមនិងវត្ថុតាង ត្រូវបានបញ្ជូនខ្លួនមកសាកសួរនិងឃុំខ្លួនបណ្តោះអាសន្ននៅផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យ ដើម្បីបន្តអនុវត្តតាមនិតិវិធីច្បាប់៕