ភ្នំពេញៈ បុរសម្នាក់ត្រូវបានប្រជាពលរដ្ឋប្រទះឃើញ មានរបួសក្បាលជាច្រើនកន្លែងពេញខ្លួន និងមានឈាមហូរស្រោចបង្កការភ្ញាក់ផ្អើល ហើយត្រូវបានប្រជាពលរដ្ឋហៅរថយន្តសាមុយមកដឹកយកទៅសង្គ្រោះបន្ទាន់នៅមន្ទីរពេទ្យ។

ហេតុការណ៍នេះកើតឡើងនៅវេលាម៉ោង៩និង៤០នាទី យប់ថ្ងៃទី៩ ខែកក្កដា ឆ្នាំ២០១៧ ស្ថិតនៅចំណុចក្រុម១ ភូមិបាក់ទូក សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ។

តាមសាក្សីពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសរងគ្រោះខាងលើនេះ បានរត់ពីតំបន់៧០ ម្តុំផ្ទះសំណាក់ស៊ីធី ស្ថិតក្នុងសង្កាត់ស្រះចក ខណ្ឌដូនពេញ មកដួលសន្លប់នៅចំណុចខាងលើ ស្ថិតក្នុងភូមិសាស្ត្រខណ្ឌឫស្សីកែវ ដោយមានឃើញរបួសក្បាលនិងខ្លួន ជាច្រើនកន្លែង។

ក្រោយមកទើបមានប្រជាពលរដ្ឋចិត្តល្អរាយការណ៍ទៅសមត្ថកិច្ចមូលដ្ឋានឲ្យមកមើលនិងហៅរថយន្តសាមុយរបស់មន្ទីរពេទ្យកាល់ម៉ែត មកដឹកទៅសង្គ្រោះបន្ទាន់តែម្តង ។

បញ្ជាក់ផងដែរថា ក្នុងហេតុការណ៍នេះ ពុំមាននរណាម្នាក់ អាចបញ្ជាក់និងដឹងពីហេតុការណ៍នេះច្បាស់លាស់នោះទេ គ្រាន់តែដឹងថាជនរងគ្រោះរត់មកទាំងឈាមស្រោចខ្លួនតែប៉ុណ្ណោះ៕