កំពត: ខណ:ពេលដែលមានភ្លៀងរលឹមតិចៗ រថយន្តពីរគ្រឿងបានបោះពួយយ៉ាងលឿនដូចគ្នា ពន្លះគ្នាពេញទំហឹងក្នុងទិសដៅផ្ទុយគ្នា បណ្ដាលឲ្យស្លាប់ម្នាក់និងរងរបួសធ្ងន់ស្រាលជាច្រើននាក់។

ហេតុការណ៍ភ្ញាក់ផ្អើលនេះបានកើតឡើតនៅវេលាម៉ោង១១ និង១០នាទីថ្ងៃត្រង់ ថ្ងៃទី១០ ខែកក្កដា ឆ្នាំ២០១៧ នៅតាមបណ្តោយផ្លូវជាតិលេខ៣ ត្រង់ចំនុចខាងកើតស្ពានព្រែករំដួល ភូមិគីឡូ១២ ឃុំកោះតូច ស្រុកទឹកឈូ ខេត្តកំពត។

ប្រភពព័ត៌មានពីលោកអនុសេនីយ៍ឯក ឈុន ឈឿន នាយផ្នែកសេនាធិការស្រុកទឹកឈូ បានប្រាប់ឲ្យដឹងថា គ្រោះថ្នាក់ខាងលើគឺបង្កឡើងដោយរថយន្តពីរគ្រឿង បុកគ្នាក្នុងទិសដៅផ្ទុយគ្នា រថយន្តទីមួយម៉ាក ហ្វុយសូ ពណ៌ខៀវលាយស ស្លាក់លេខ PP 2405 បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ក្រោយមានហេតុការណ៍ ចំណែករថយន្តមួយគ្រឿងទៀតម៉ាក តូរីស គ្មានស្លាកលេខ បើកបរដោយបុរសម្នាក់និងមានដឹកអ្នកដំណើរសរុប១១នាក់ ក្នុងនោះស្រីចំនួន៤នាក់។

ប្រភពដដែលបានបន្តថា ក្នុងហេតុការណ៍នេះ បណ្តាលឲ្យមានអ្នកស្លាប់ម្នាក់ ភេទប្រុស ជាអ្នកបើកបរ ព្រមទាំងរបួសធ្ងន់៧នាក់និងស្រាល៣នាក់ទៀតផងដែរ។

បើតាមប្រភពពីអ្នកឃើញហេតុការណ៍បានរៀបរាប់ថា គេឃើញរថយន្តទាំងពីរខាងលើបើកបរបញ្ជ្រាសគ្នា ក្នុងល្បឿនលឿនទំនងជាប្រញ៉ាប់រៀងៗខ្លួន លុះមកដល់ចំនុចខាងលើ មានលាយឡំភ្លៀងតិចៗទំនងជាហ្វ្រាំងមិនសូវស៊ី បានជាពន្លះគ្នាយ៉ាងដូច្នេះ។

ភ្លាមៗនោះអ្នករបួសត្រូវបានគេបញ្ជូនទៅកាន់មន្ទីរពេទ្យ ចំណែករថយន្តត្រូវទុករង់ចាំសមត្ថកិច្ចចុះត្រួតពិនិត្យវាស់វែង និងដោះស្រាយតាមនីតិវិធីច្បាប់៕