នៅវេលាម៉ោង១១ ថ្ងៃត្រង់ ទី១០ កក្កដា មុននេះ ម្ដាយបង្កើតរបស់តារាចម្រៀងរ៉ូលីន បានស្លាប់ហើយ បន្ទាប់ពីមានជំងឺរ៉ាំរ៉ៃប្រមាណជា១ឆ្នាំមកហើយ។ អ៊ីចឹងទើបកញ្ញា ជាន់ដីកម្ពុជាមិនទាន់បាត់ក្ដៅជើងផង ក៏ក្លាយជាមេចាត់ចែងធ្វើបុណ្យសពឲ្យម្ដាយតែម្ដង ក្រោយបញ្ចប់ការសម្ដែងនៅអាមេរិកយ៉ាងជោគជ័យនោះ។

នេះគឺជាទុក្ខធំមួយដែលតារាភេទទី៣រូបនេះបានជួបប្រទះ ក្រោយពីកេរ្តិ៍ឈ្មោះក្នុងសិល្ប:ស្ទុះឡើង។
លោក ជួប ច័ន្ទកក្កដា ហៅ រ៉ូលីន បានអះអាងថាម្ដាយរបស់លោកគឺអ្នកស្រី ស៊ិន ស៊ីផងា អាយុ៧០ឆ្នាំ ដែលមានជំងឺសួតធ្ងន់ធ្ងរបានលាចាកលោកហើយ ដោយបន្សល់នូវកូនប្រុស៣នាក់ ដោយមានលោកជាកូនពៅ។ លោកថា ម្ដាយរបស់លោកធ្លាក់ខ្លួនឈឺ១ឆ្នាំហើយ ប៉ុន្តែមកពីលោកមិនដែលប្រកាសទើបមិនសូវមានអ្នកដឹង។

លោកថាសពរបស់ម្ដាយលោកត្រូវបានតម្កល់ធ្វើបុណ្យនៅទីរួមខេត្តកំពង់ស្ពឺ ដោយមិនទាន់កំណត់ពេលប៉ុន្មានថ្ងៃទើបបូជានោះទេ ដោយសារតែនៅទីនោះមានបងប្អូនច្រើនចាត់ចែងធ្វើបុណ្យ។ លោកថាអ្នកស្រី ទទួលមរណភាពនៅវេលាម៉ោង១១ថ្ងៃត្រង់ទី១០ ខែកក្កដា ឆ្នាំ២០១៧ មុននេះ ដោយលោកចាត់ទុកថាមរណភាពរបស់ម្ដាយ ក៏ជួយឲ្យអ្នកស្រីផុតទុក្ខផុតទោស ក្នុងពេលធ្វើទុក្ខផងដែរ។

លោកថាបុណ្យសពម្ដាយលោក មិនដឹងថាមានតារាណាខ្លះអាចចូលរួមបាននោះទេ ដោយសារតែត្រូវធ្វើនៅខេត្ត ប៉ុន្តែតារាដែលមានទំនាក់ទំនងជិតស្និទ្ធិសុទ្ធតែបានប្រកាសចូលរួមទៅដល់ទីនោះ៕