កំពង់ឆ្នាំង: លោក ម៉ាត លី អធិការស្រុកកំពង់ត្រឡាចបានប្រាប់ Post News ថា មានករណីគ្រោះថ្នាក់ចររាចរណ៍មួយបានកើតឡើងរវាងរថយន្តនិងរថយន្តបុកបន្តកន្ទុយគ្នា៤គ្រឿងបណ្ដាលឲ្យមានអ្នករងរបួសនិងខូចខាតរថយន្តទាំងសងខាង។

ហេតុការណ៍នេះបានកើតឡើងនៅវេលាម៉ោង២រសៀល ថ្ងៃទី៩ ខែកក្កដា ឆ្នាំ ២០១៧ នៅចំណុចចន្លោះគីឡូម៉ែត្រលេខ៥០និង៥១ ភូមិតាកុល ឃុំពានី ស្រុកកំពង់ត្រឡាច ខេត្តកំពង់ឆ្នាំង។

ប្រភពព័ត៌មានបានឲ្យដឹងថា ហេតុការណ៍នេះកើតឡើងរវាងរថយន្តម៉ាកឡិចស៊ីស ពណ៌ស្ករ ពាក់ស្លាកលេខ ភ្នំពេញ2Y 5936 អ្នកបើកបរមិនស្គាល់ឈ្មោះនិងអាសយដ្ឋាន បើកបរពីទិសខាងជើង បានបុកនិងរថយន្តម៉ាកDEAWOO ពណ៌ស ពាក់ស្លាកលេខ ភ្នំពេញ 2R 6405 អ្នកបើកបរមិនស្គាល់ឈ្មោះនិងអាសយដ្ឋានចំពីក្រោយ ហើយរថយន្តនោះបានវិលទៅបុកនិងរថយន្តម៉ាកហាន់ដាយ ពណ៌ស ពាក់ស្លាកលេខ ភ្នំពេញ3C 4165 អ្នកបើកបរមិនស្គាល់ឈ្មោះនិងអាសយដ្ឋាន ក្នុងដំណើរច្រាសទិសគ្នា ហើយរថយន្តDEAWOOមិនទាន់អស់ល្បឿនក៏បានទៅបុកនិងរថយន្តម៉ាកហាយឡែនឌ័រ ពណ៌ទឹកមាស ពាក់ស្លាកលេខ ភ្នំពេញ 2H 8210 អ្នកបើកបរឈ្មោះលី លន ភេទប្រុស អាយុ៤៩ឆ្នាំ នៅភូមិរំចក៤ សង្កាត់រតន: ក្រុងបាត់ដំបងខេត្តបាត់ដំបង ក្នុងដំណើរច្រាសទិសគ្នា។

ក្នុងហេតុការណ៍នេះដែរ បានបណ្ដាលឲ្យរថយន្ត៤គ្រឿងរងការខូចខាត (ខូចខាតធ្ងន់ធ្ងរ២គ្រឿង) និងមនុស្សរងរបួសស្រាលម្នាក់។

ក្រោយពេលកើតហេតុ សមត្ថកិច្ចបានធ្វើការចុះវាស់វែងដើម្បីកសាងសំណុំរឿងដោះស្រាយតាមនីតិវិធីច្បាប់៕