ភ្នំពេញ: រថយន្តតូយ៉ូតា តាកូម៉ា មួយគ្រឿង អ្នកបើកបរស្ទើភ្លើង ជាន់ហ្គាបង្ខំក៏បោលជ្រុល ទៅបុកពាងទឹកបែកអស់១ ស្លន់ពេកបួងចង្កូតជ្រុលទាញ ធ្លាក់ចូលត្រាំទឹកស្រះសំណាងល្អ អ្នកបើកបរលូនចេញរួច ផ្អើលអ្នកជិតខាងរត់ទៅជួយ។
ហេតុការភ្ញាក់ផ្អើលនេះ បានកើតឡើងកាលពីវេលាម៉ោង៩ និង២០នាទីយប់ ថ្ងៃទី១៥ ខែកក្កដា ឆ្នាំ២០១៧ នៅស្រះទឹក ក្នុងភូមិស្លែងរលើងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
រថយន្តបង្កហេតុ ម៉ាកតូយ៉ូតា តាកូម៉ាពណ៌សំបកឪឡឹក ពាក់ស្លាកលេខ ភ្នំពេញ 2B 2616 ប៉ន្តែតៃកុងរថយន្ត មិនបានស្គាល់អត្តសញ្ញាណនោះទេ។
តាមប្រភពនៅកន្លែងកើតហេតុ បានឲ្យដឹងថា មុនកើតហេតុ គេឃើញបុរសម្នាក់ បានបើករថយន្តខាងលើចេញពីការដ្ឋានសំណង់មួយកន្លែង ឆ្ពោះទៅកើត ដោយសារអ្នកបើកបរ មិនស្ទាត់ដៃក៏រេចង្កូត ជាន់ហ្គាទាំងបង្ខំ ក៏ជ្រុលទៅបុកពាងទឹកបែកអស់១ ហើយស្លន់ពេកបួងចង្កួតទៅស្តាំ ទាញជ្រុលធ្លាក់ចូលទៅក្នុងទឹកស្រះ សំណាងល្អអ្នកបើកបរលូនចេញក្រៅរួច ពុំមានរងរបួស។
ក្រោយកើតហេតុ ពុំឃើញមានសមត្ថកិច្ច បានចុះទៅដល់កន្លែងកើតហេតុនោះទេ ហើយរថយន្តខាងលើ ត្រូវបានម្ចាស់ ហៅរថយន្តស្ទូចមកលើកឡើងគោក ដើម្បីយកទៅជួសជុលដោយខ្លួនឯង ខណ:ដែលមិនបង្ករងគ្រោះដល់អ្នកដទៃ ៕
មតិយោបល់