ពោធិ៍សាត់ៈ លោកអធិការស្រុកក្រគរ បានប្រាប់ Post News ថា មានករណីគ្រោះថ្នាក់ចរាចរណ៍បានកើតឡើង រវាងគោយន្តកន្ត្រៃ បានបុកជាមួយនឹងម៉ូតូវេវអាល់ហ្វា បណ្តាលឲ្យបុរសម្នាក់ស្លាប់មួយរំពេច។

ហេតុការណ៍នេះបានកើតឡើងកាលពីវេលាម៉ោង៧និង៣០នាទី យប់ថ្ងៃទី៣ ខែសីហា ឆ្នាំ២០១៧ ស្ថិតនៅចំណុចផ្លូវក្រាលក្រួសក្រហម ក្នុងភូមិបឹងស្មុក ឃុំឈើតុំ ស្រុកក្រគរ ខេត្តពោធិ៍សាត់។

ប្រភពព័ត៌មានបានឲ្យដឹងថា គ្រោះថ្នាក់ចររាចរណ៍គឺកើតឡើងដោយគោយន្តកន្ត្រៃ បើកបរខ្វះការប្រយត្ន័បានបុកជាមួយនឹងម៉ូតូម៉ាកវ៉េវអាល់ហ្វា ពាក់ស្លាកលេខ ពោធិ៍សាត់ 1E-4921 បណ្តាលឲ្យបុរសម្នាក់ឈ្មោះ សិត ម៉េត អាយុ៤៥ឆ្នាំ ភេទប្រុស ស្នាក់នៅភូមិកំរ៉ែង ឃុំស្វាយស ស្រុកក្រគរ
ខេត្តពោធិ៍សាត់ ស្លាប់ភ្លាមៗមួយរំពេច ត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី។ ចំណែកគោយន្តកន្ត្រៃបង្កវិញ បានបន្តដំណើរបើកគេចខ្លួន ពេលនោះសមត្ថកិច្ចក៏បានឃាត់គោយន្តដែលបើកឆ្លងកាត់ ចំនួន៦គ្រឿងដើម្បីត្រួតពិនិត្យ តែពេលត្រួតពិនិត្យទៅលើគោយន្តទាំង ៦គ្រឿងនេះ ពុំមានស្លាកស្នាមអ្វីទេ ទើបអនុញ្ញាតឲ្យពួកគាត់បន្តដំណើរទៀតតែម្តង ព្រោះគោយន្តបង្កបានបើកគេចខ្លួនបាត់ទៅហើយ៕