បន្ទាយមានជ័យ៖ មន្ត្រីពេទ្យសត្វខេត្ត សហការជាមួយកម្លាំងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ និងនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានចេញប្រតិបត្តិការបង្ការទប់ស្កាត់ និងបង្ក្រាបបានរថយន្តដឹកសត្វមាន់នាំពីប្រទេសថៃ ចូលមកប្រទេសកម្ពុជាខុសច្បាប់ តាមច្រករបៀងអូរបីជាន់ ស្ថិតក្នុងឃុំអូរបីជាន់ ស្រុកអូរជ្រៅ និងច្រករបៀងបន្ទាយទី១ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ចំនួន ២គ្រឿង។
ប្រតិបត្តិការនេះ ធ្វើឡើងនៅកាលពីម៉ោងជាង ១០យប់ ថ្ងៃទី៦ ខែមេសា ឆ្នាំ២០១៦ ខណ:ដែលរថយន្តទាំង ២គ្រឿង បានធ្វើដំណើរចេញពីច្រករបៀង មកដល់ក្រុងសិរីសោភ័ណ រថយន្តនីសាន់ ពណ៌ខ្មៅ ១គ្រឿង និងរថយន្ត ១គ្រឿងទៀត ដឹកផ្ទុកទម្ងន់៥តោន ពណ៌ស មកដល់នៅចំណុចស្ពានទី១ ខាងមុខច្រករបៀងអូរបីជាន់។
កម្លាំងសមត្ថិច្ចចម្រុះ ដឹកនាំដោយលោក ហ៊ុយ ទូច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មខេត្ត ដែលមានការសម្រុះ សម្រួលនីតិវិធីពីលោក ផាន់ ភីរម្យ ព្រះរាជអាជ្ញារងអមសាលាដំបូងខេត្ត ចុះបង្ក្រាបរថយន្តដឹកសត្វមាន់ទាំង២គ្រឿងនោះ សមត្ថកិច្ចចាប់បញ្ជូនមកកាន់មន្ទីរកសិកម្មខេត្ត ហើយធ្វើការត្រួតពិនិត្យសត្វមាន់ ដឹកតាមរថយន្តទាំង ២គ្រឿងមានចំនួនសរុបជាង ១ពាន់ក្បាល។
លោក ហ៊ុយ ទូច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្មខេត្ត បានប្រាប់ឱ្យដឹងថា សមត្ថកិច្ចបង្ក្រាបរថយន្តដឹកសត្វមាន់ទាំង ២គ្រឿង ដោយអនុវត្តតាមផែនការ ដាក់ចេញដោយលោក សួន បវរ អភិបាលខេត្តបន្ទាយមានជ័ួ ទើបតែទទួលបានមុខតំណែងថ្មី ទៅលើវិធានការបង្ការទប់ស្កាត់ រិតបន្តឹង ដើម្បីធានាបានសុវត្ថិភាពម្ហូបអាហារ ជូនដល់ប្រជាពលរដ្ឋ ក្នុងឱកាសបុណ្យចូលឆ្នាំខ្មែរ ខាងមុខ ខ្លាចក្រែងការនាំចូលសត្វមាន់ខុសច្បាប់ ពីសំណាក់ក្រុមឈ្មួញ ដែលគ្មានការត្រួតពិនិត្យត្រឹមត្រូវពីមន្ត្រីជំនាញ នូវសត្វមាន់ដែលមានជំងឺឆ្លង ហើយប្រជាពលរដ្ឋមិនដឹងទិញយកទៅបរិភោគ បង្កឱ្យគ្រោះថ្នាក់សុខភាពប្រជាពលរដ្ឋ មិនតែប៉ុណ្ណោះការនាំចូលសត្វបក្សីខុសច្បាប់ បង្កឱ្យខាតបង់ប្រាក់ចំណូលរដ្ឋ និងបង្កប៉ះពាល់ដល់ការចិញ្ចឹមសត្វបក្សីក្នុងស្រុកទៀតផងដែរ។
លោកប្រធានការិយាល័យរូបនេះ បានបញ្ជាក់ទៀតថា មន្ត្រីជំនាញពេទ្យសត្វខេត្ត បានធ្វើការត្រួតពិនិត្យ និងវិភាគតាមជំនាញគឺរកឃើញថា សត្វមាន់ដឹកតាមរថយន្តខាងលើ គ្មានលិខតិស្នាមត្រឹមត្រូវ មាន់មានសុខភាពល្អ សត្វមាន់ងាប់មួយចំនួនដោយសារការដឹកជញ្ជូនមានសភាពចង្អៀត រួមផ្សំនឹងអាកាសធាតុក្តៅ៕ អត្ថបទ: ប៊ុត សារុន
មតិយោបល់