ព្រៃវែង: នៅវេលាម៉ោង ០៦ និង ៤០នាទីព្រឹកថ្ងៃទី ១៣ ខែសីហានេះ មានករណីគ្រោះថ្នាក់ចរាចរណ៍មួយ ដោយរថយន្ត១គ្រឿង បានបុកគ្នាជាមួយម៉ូតូ បណ្ដាលឲ្យស្លាប់ម្នាក់ភ្លាមៗ នៅនឹងកន្លែង។

ហេតុការណ៍នេះ បានកើតទ្បើងនៅលើផ្លូវជាតិលេខ១ ស្ថិតក្នុងភូមិដូនទុង ឃុំប្រាសាទ ស្រុកកំពង់ត្របែក ខេត្តព្រៃវែង។

រថយន្ត១គ្រឿងម៉ាក HYUNDAI ពណ៌ស (ដឹកខ្សាច់ពេញ) ពាក់ស្លាកលេខភ្នំពេញ3C.4748 មិនស្គាល់អត្តសញ្ញាណអ្នកបើកបរ បានបើកពីទិសខាងលិចមកដល់ចំណុចខាងលើ ចន្លោះគីឡូរម៉ែត្រ លេខ៩៥-៩៦ បានបុកម៉ូតូ១គ្រឿង ម៉ាកស្កុបពី ពណ៌ស ពាក់ស្លាកលេខភ្នំពេញ1FP.3990 ពីក្រោយបើកបរដោយឈ្មោះ រី លីនីត ភេទប្រុស អាយុ ១៦ឆ្នាំ នៅភូមិដូនទុង ឃុំប្រាសាទ ដែលកំពុងបត់ឆ្លងផ្លូវចូលផ្ទះ បណ្តាលឲ្យស្លាប់ភ្លាមនៅកន្លែងកើតហេតុ។

ក្រោយពេលកើតហេតុ អ្នកបើកបររថយន្តបានរត់គេចខ្លួនបាត់ ចំណែកសាកសពវិញ ត្រូវបានសមត្ថកិច្ចប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី រីឯរថយន្ត និងម៉ូតូ ត្រូវបានយកទៅរក្សាទុកនៅអធិការដ្ឋាននគរបាល ដើម្បីរងចាំការដោះស្រោយគ្នានៅពេលក្រោយ៕