ភ្នំពេញៈ នគរបាលខណ្ឌឫស្សីកែវ សហការជាមួយនគរបាលប៉ុស្តិ៍ស្វាយប៉ាក បានធ្វើការឃាត់ខ្លួនស្ត្រីម្នាក់ជាក់ស្តែង និងដកហូតថ្នាំញៀន ៧កញ្ចប់តូចធំ កាលពីវេលាម៉ោង ៩និង៤០នាទីយប់ ថ្ងៃទី០២ ខែកញ្ញា ឆ្នាំ២០១៧ នៅត្រង់ចំណុចផ្លូវបេតុង ក្រុម៧ ភូមិលូ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ជនសង្ស័យឃាត់ខ្លួនខាងលើមានឈ្មោះ ពេជ្រ លីន ភេទស្រី អាយុ ២៥ឆ្នាំ មុខរបរមិនពិតប្រាកដ (ជួញដូរគ្រឿងញៀន) ស្នាក់នៅផ្ទះជួល ក្រុម៧ ភូមិលូ សង្កាត់ស្វាយប៉ាក។

សមត្ថកិច្ចបានឲ្យដឹងថា នៅមុនពេលឃាត់ខ្លួនជនសង្ស័យខាងលើ កម្លាំងសមត្ថកិច្ចបានធ្វើការស្រាវជ្រាវ រហូតឈានដល់ការឃាត់ខ្លួនជាក់ស្តែង នៅមុខសញ្ញាជួញដូរ និងចែកចាយគ្រឿងញៀន ព្រមទាំងដកហូតម្សៅក្រាមពណ៌សថ្លាចំនួន ៧កញ្ចប់ ក្នុងនោះមាន មួយកញ្ចប់ធំ ដែកចុងស្រួចចំនួន មួយដើម និងដែកកេះចំនួន ២ដើម ហើយកម្លាំងសមត្ថកិច្ច បានយកជនសង្ស័យមកប៉ុស្តិ៍នគរបាលស្វាយប៉ាក ដើម្បីធ្វើការសួរនាំ។

បច្ចុប្បន្នជនសង្ស័យខាងលើ រួមនឹងវត្ថុតាង ត្រូវសមត្ថកិច្ចឃាត់ខ្លួនជាបណ្តោះអាសន្ន នៅអធិការដ្ឋាននគរបាលខណ្ឌឫស្សីកែវ ដើម្បីចាត់ការបន្តតាមនីតិវិធីច្បាប់៕