កណ្តាល: គ្រោះថ្នាក់ចរាចរណ៍មួយ បានកើតឡើង បង្កឲ្យមានការភ្ញាក់ផ្អើល ខណៈដែលបុរសម្នាក់ បានឈប់រថយន្តឲ្យក្រុមគ្រួសារ ចុះទិញឥវ៉ាន់ ប៉ុន្តែបែរជាន់ហ្គាច្រឡំថាហ្វ្រាំង បណ្តាលឲ្យបុកស្លាប់ក្មេងម្នាក់ និងរបួសស្រាលម្នាក់។

ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង០៨ និង១០នាទី ថ្ងៃទី០៣ ខែកញ្ញា ឆ្នាំ២០១៧ នៅលើផ្លូវជាតិលេខឆ ចន្លោះគីឡូម៉ែត្រលេខ១៩-២០ ត្រង់ចំណុចផ្សារគគីរ ភូមិគគីរ ឃុំដីឥដ្ឋ ស្រុកកៀនស្វាយ ខេត្តកណ្តាល។

តាមសមត្ថកិច្ច បានឲ្យដឹងថា ករណីនេះ បានបង្កឡើងដោយរថយន្ត ម៉ាក TOYOTA HIGHLANDER ពណ៌ ទឹកមាស ប្រភេទទេសចរណ៍ ពាក់ផ្លាកលេខភ្នំពេញ 2AC-0667 បើកបរដោយឈ្មោះ ជួប សារ៉េត ភេទប្រុស អាយុ៥៣ឆ្នាំ មានទីលំនៅ ផ្ទះ៣៧០ ផ្លូវលំ ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដោយអ្នកបើកបរមានទិសដៅពីភ្នំពេញទៅអ្នកលឿង ពេលបើកមកដល់ចំណុចកើតហេតុខាងលើ បានឈប់អែបខាងស្តាំឲ្យអ្នករួមដំណើរចុះទិញសម្ភារៈ តែពេលកំពុងឈប់ភ្លេចដោះលេខ ហើយជាន់ហ្គាច្រទ្បំថាហ្រ្វាំង ក៏​បណ្ដាលឲ្យរថយន្តជ្រុលល្បឿនទៅមុខ ក៏បុកនឹងកង់កំពុងជិះ ដោយឈ្មោះ ហុក ណាលីស ភេទ
ស្រី អាយុ១៣ឆ្នាំ មានលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល រួមមានអ្នករួមដំណើរ
ម្នាក់ទៀត ឈ្មោះហុក ឆាយហេង ភេទប្រុស អាយុ ៩ ឆ្នាំ មានទីលំនៅភូមិជាមួយគ្នា ដែលជិះក្នុងទិដៅស្របគ្នា
បណ្តាលឲ្យស្លាប់អ្នករួមដំណើរឈ្មោះ ហុក ឆាយហេង និងរបួសស្រាល អ្នកជិះកង់ឈ្មោះ ហុក ណាលីស ត្រូវបានបញ្ជូនទៅព្យាលបាលនៅមន្ទីរពេទ្យអង្អែកស្រុកកៀនស្វាយ។

ក្រោយពេលកើតហេតុ សមត្ថកិច្ចបានឃាត់ខ្លួន អ្នកបើកបររថយន្ត រួមទាំងយករថយន្ត និងកង់មករក្សាទុក ជាភស្តុតាងនៅអធិការដ្ឋាន នគរបាលស្រុកកៀនស្វាយ ដើម្បីរងចាំដោះស្រាយគ្នានៅពេលក្រោយ៕