ភ្នំពេញៈ រថយន្តកុងតឺន័រ១គ្រឿង បើកឆ្លងផ្លូវបុករថយន្តហ្វតសេរ៊ីទំនើប ខូចមួយចំហៀងជ្រុលធ្លាក់ប្រឡាយទឹកបុករះដើមឈើបាក់អស់មួយដើម។

ហេតុការណ៍នេះបង្កឲ្យមានការភ្ញាក់ផ្អើលកាលវេលាម៉ោង ៥ និង៤០នាទីល្ងាចថ្ងៃទី៦ ខែកញ្ញា ឆ្នាំ២០១៧ ស្ថិតតាមបណ្តោយផ្លូវជាតិលេខ៤ ម្តុំលក់សាច់ក្រក់ ស្ថិតនៅភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានបញ្ជាក់ថា មុនពេលកើតហេតុ គេឃើញរថយន្តម៉ាក ហ្វតរ៉េងជ័រ ពណ៌ស ពាក់ស្លាកលេខ ភ្នំពេញ1AP-6918 បើកបរដោយបុរសម្នាក់នឹងអ្នករួមដំណើរ៤នាក់ទៀតសរុប៥នាក់ ក្នុងនោះមានស្រ្តីម្នាក់ បានធ្វើដំណើរតាមបណ្ដោយផ្លូវជាតិលេខ៤ក្នុងទិសដៅពីកើតទៅលិចយ៉ាងលឿន។ លុះមកដល់កន្លែងកើតហេតុ ស្រាប់តែឃើញរថយន្តប្រភេទកុងតឺន័រ ម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ3B-7773 បើកបរក្នុងទិសដៅពីលិចទៅកើតហើយឆ្លងផ្លូវ ខណៈនោះរថយន្តហ្វតរ៉េងជ័រខាងលើបានបើកគេចទៅខាងស្តាំ ។ ចំណែកឯរថយន្តកុងតឺន័របានបើកឆ្លងផ្លូវទាំងល្បឿនលឿនក៏ជ្រុលទៅបុករថយន្តហ្វតរ៉េងជ័រចំហៀងខាងឆ្វេង បណ្តាលឲ្យប៉ើងខ្ទាតទៅចញ្ចើមផ្លូវម្ខាង រីឯរថយន្តបង្កបុកដើមអំពិលទឹកបារាំងជ្រុលធ្លាក់ប្រឡាយ តែសំណាងល្អមិនបង្កឲ្យគ្រោះថ្នាក់ដល់អាយុជីវិតនណាម្នាក់ឡើយ។

ក្រោយពេលកើតហេតុ គេឃើញកម្លាំងនគរបាលមូលដ្ឋានចុះទៅកន្លែងកើតហេតុដើម្បីធ្វើចរាចរណ៍ព្រមទាំងទំនាក់ទំនងនគរបាលជំនាញចរាចរណ៍ខណ្ឌពោធិ៍សែនជ័យ ធ្វើការវាស់វែងនឹងយកទៅរក្សាទុករង់ចាំការដោះស្រាយគ្នាតាមផ្លូវច្បាប់៕