កណ្តាល: ទំនាស់ពាក្យសម្តីធ្វើឲ្យឳពុកក្មេក ទាញកាំភ្លើងដែលលាក់ទុកជាយូរឆ្នាំនោះ យកមកកំឡាកូនប្រសារ ដោយសារកូនប្រសារមើលងាយពេក ដែលហេតុការណ៍នេះ បានកើតឡើងកាលពីវេលាម៉ោង១៩ និង១០នាទីថ្ងៃទី០៣ ខែតុលា ឆ្នាំ២០១៧
នៅចំណុច អូថ្លុកសួង ស្ថិតនៅភូមិពោធិក្រោម ឃុំត្រើយស្លា ស្រុកស្អាង ខេត្តកណ្តាល។

បើតាមលោកវរសេនីយ៍ សេង សុជាតិ អធិការស្រុកស្អាង បានប្រាប់ Post News ឲ្យដឹងថា៖ ជនសង្ស័យឈ្មោះ វង់ ថៃ ភេទប្រុស អាយុ ៥៧ ឆ្នាំ នៅភូមិពោធិក្រោម ឃុំត្រើយស្លា ស្រុកស្អាង ខេត្តកណ្តាល មុខរបរ កសិករ។ វត្ថុតាងចាប់យករួមមាន៖ កាំភ្លើងចំនួន ០១ដើមម៉ាក់ AK ៤៧( ស្វ័យបត់) លេខ៥៦-១-១៩០៦៩៦-១៦ បង់ចំនួន០១ មានចំនួន៣០គ្រាប់។

លោកអធិការបានបញ្ជាក់ថា៖ នៅថ្ងៃខែឆ្នាំវេលាម៉ោងកើតហេតុខាងលើ ឈ្មោះ វង់ ថៃ បានមានទំនាស់ពាក្យសម្តីជាមួយកូនប្រសារឈ្មោះ ឈីវ ឈាន ក៏បានទៅយកកាំភ្លើងដែលលាក់ទុកក្នុងផ្ទះគាត់( វង់ថៃ ) ដើម្បីយកទៅគំរាមកូនប្រសារ ឈ្មោះឈីវ ឈាន កុំឲ្យមើលងាយគាត់(ថៃ)ពេក ដោយបន្ទាប់ពីទទួលបានពត៌មាននេះ កម្លាំងប៉ុស្តិ៍ត្រើយស្លា បានចុះទៅដល់កន្លែងកើតហេតុធ្វើការឃាត់ខ្លួន ឈ្មោះ វង់ ថៃ រួមទាំងវត្ថុតាងបញ្ជូនមកអធិការស្រុកស្អាង ដើម្បីចាត់ការតាមនីតិវិធីច្បាប់៕