ព័ត៌មានជាតិ

កូនប្រុសរមិលគុណ! គំរាមចាប់រំលោភម្ដាយហើយនៅចង់សម្លាប់ម្តាយចោលទៀត!

ភ្នំពេញ: បុរសវ័យជាង៣០ឆ្នាំម្នាក់ ដោយសារធ្លាក់ខ្លួនក្នុងល្បែងគ្រឿងញៀន វីវក់វង្វេងដល់កម្រឹតលែងស្គាល់អាក្រក់ល្អ សខ្មៅ បងប្អូន លែងស្គាល់គុណទោស បុណ្យបាបអ្វីទាំងអស់ បង្កបញ្ហាអុកឡុកក្នុងក្រុមគ្រួសារ ជាញឹកញាប់មិនចេះចប់មិនចេះហើយ ជួបតែរឿងអពមង្គលក្នុងគ្រួសារ គំរាមចាប់ម្តាយជាអ្នកមានគុណរំលោភ បំផ្លិចបំផ្លាញទ្រព្យសម្បត្តិក្នុងផ្ទះ អស់ជាបន្តបន្ទាប់ ទើបម្តាយទ្រាំលែងបានប្តឹងសមត្ថកិច្ចឲ្យចាប់ខ្លួន កាលពីវេលាម៉ោង៩ព្រឹក ថ្ងៃទី៥ ខែតុលា ឆ្នាំ២០១៧ ស្ថិតក្នុងផ្ទះដែលនៅជាប់និងរបងវត្តអង្គតាម៉ិញ ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

កូនរមិលគុណខាងលើមានឈ្មោះ ចាន់ ធារិទ្ធ អាយុ ៣២ឆ្នាំ មុខរបរមិនពិតប្រាកដ រស់នៅផ្ទះកើតហេតុខាងលើ មានម្តាយជាស្រ្តីម៉េម៉ាយ ឈ្មោះ ទូច ថុល អាយុ៥០ឆ្នាំ មានកូនចំនួន៥នាក់ ប្រុសម្នាក់ ស្រី៤នាក់ កូនប្រុសខាងលើជាកូនច្បង។

តាមស្រ្តីជាម្តាយបានឲ្យដឹងថា កូនប្រុសរូបនេះ ធ្លាប់មានប្រពន្ធចំនួន២លើកមកហើយថែមទាំងមានកូន២ទៀតផង (ប្រពន្ធមុនកូន១ និង ក្រោយ១ដូចគ្នា) ដោយសារការប្រព្រឹត្តល្បែងគ្រឿងញៀន វាយធ្វើបាបប្រពន្ធកូន ទើបគេរត់ចោលទាំងប្រពន្ធមុន និងប្រពន្ធក្រោយ ដោយទ្រាំនៅការធ្វើបាបទាំងផ្លូវកាយនិងផ្លូវចិត្តលែងបាន។ សូម្បីតែប្អូនៗស្រីបង្កើតរបស់ខ្លួន ក៏គំរាមធ្វើបាប ធ្វើឲ្យគ្នាភ័យខ្លាចទើបនាំគ្នារត់ចេញពីផ្ទះអស់ ទៅគេងនៅបន្ទប់ជួលអស់ គឺនៅសល់តែម្តាយ និងកូនប្រុសម្នាក់នេះ រស់នៅក្នុងផ្ទះតែមួយ។

តាមប្រភពព័ត៌មានពីស្រ្តីដដែល បានបញ្ជាក់ទាំងទឹកភ្នែកថា រងកម្មមួយថ្ងៃៗ កូនប្រុសអុកឡុក ក្នុងផ្ទះ វាយខ្ទេចអស់ទ្រព្យសម្បត្តិ ទាំងទ្វារ កញ្ចក់ តុ ទូ ពាង សម្ភារ:ប្រើប្រាស់ មិនតែប៉ុណ្ណោះ អ្វីដែលមិននឹកស្មានដល់ កូនប្រុសទទួលឥទ្ធិពលពីគ្រឿងញៀន ហ៊ានគំរាម ចាប់រំលោភម្តាយ សម្តីប្រមាថមើលងាយ មកលើរូបគាត់ ដែលជាអ្នកមានគុណធ្ងន់ដែលមិនអាចកាត់ថ្លៃបាន បង្កឲ្យភ័យព្រួយបារម្ភពីសុវត្ថិភាព កាលបើនិយាយលែងស្តាប់ម្តាយទៅហើយ រហូតទ្រាំលែងបាន ក្រោយ២ថ្ងៃផ្ទួនៗគ្នា ប៉ុនប៉ងចាប់ម្តាយរំលោភ ទើបទ្រាំលែងបាន ទើបគាត់សម្រេចចិត្តប្តឹងសមត្ថកិច្ចឲ្យចាប់ខ្លួន យកទៅប៉ុស្តិ៍រដ្ឋបាលចោមចៅ កាលពីវេលាម៉ោង៩ព្រឹក ថ្ងៃទី៥ ខែតុលាឆ្នាំ ២០១៧នេះតែម្តង ។

ក្នុងការចុះអន្តរាគមន៍ របស់កម្លាំងនគរបាល ចូលទៅឃាត់ខ្លួនជនសង្ស័យដោយជនសង្ស័យបានចាក់សោខ្ទាស់ទ្វារពីខាងក្នុងផ្ទះ ហើយត្រូវបានកម្លាំងនគរបាលប៉ុស្តិ៍ចោមចៅ ចុះទៅហៅទើបចាប់បាន ដោយសន្តិវិធី មិនមានបញ្ហាអ្វីកើតឡើងនោះឡើយ។ ដោយផ្អែកទៅលើម្តាយដែលជាដើមបណ្តឹង បានស្នើសុំធ្វើយ៉ាងណា កុំត្រឹមតែអប់រំហើយឱ្យចេញមកវិញអី នោះគាត់ជាម្តាយច្បាស់ជារស់ នៅមិនសុខទេស្រួលមិនស្រួលអាចសម្លាប់រូបគាត់ចោលទៀតដោយស្នាដៃកូនប្រុសតិរច្ឆាននេះជាមិនខាន ពោលសុំតែម្យ៉ាងគឺឱ្យអ្នកច្បាប់ ធ្វើយ៉ាងណា យកទៅអប់រំ កាន់តែយូរកាន់តែល្អ កាលបើកូនរូបនេះបានគំរាមហើយថា កាលណាចេញពីគុក ចាប់រំលោភហើយ សម្លាប់ម្តាយចោល ទើបធ្វើឱ្យគាត់ភិតភ័យខ្លាំបែបនេះ។

ជនសង្ស័យក្រោយពីចាប់ខ្លួនតាមបណ្តឹងម្តាយរួចមក នាំខ្លួនទៅសាកសួរនៅប៉ុស្តិ៍ចោមចៅ ដើម្បីកសាងសំណុំរឿងតាមនីតិវិធីច្បាប់៕

មតិយោបល់