សៀមរាបៈ លោកអធិការស្រុកជីក្រែង បានប្រាប់Post Newsថា មានករណីគ្រោះថ្នាក់ចរាចរណ៍មួយ បានកើតឡើង រវាងរថយន្តបើកបុកអ្នកជិះកង់ បណ្តាលឲ្យរបួសធ្ងន់ រួចក៏ជ្រុលចង្កូតទៅបុកគោយន្ត បង្កការខូចខាតយ៉ាងដំណំ។

ហេតុការណ៍នេះ បានកើតឡើង កាលពីវេលាម៉ោង១១និង១០នាទីថ្ងៃត្រង់ ថ្ងៃទី២៥ ខែវិច្ឆិកា ឆ្នាំ២០១៧​ នៅត្រង់ចំណុចមុខសាលារៀនសម្ព័នភាព ផ្លូ​វជាតិលេខ៦ ស្ថិតក្នុងភូមិចក ឃុំសង្វើយ ស្រុកជីក្រែង ខេត្តសៀមរាប។

ជនរងគ្រោះ មានឈ្មោះជាន សារ៉ា ភេទស្រី អាយុ១៥ឆ្នាំ ស្នាក់នៅភូមិកន្សែង ឃុំសង្វើយ ស្រុកជីក្រែង ខេត្តសៀមរាប និងជនបង្កមិនត្រូវបានស្គាល់អត្តសញ្ញាណច្បាស់នោះទេ បើករថយន្តមួយគ្រឿង ម៉ាកសាំយ៉ុង ពណ៌សំបកឪឡឹក ពាក់ស្លាកលេខ​ភ្នំពេញ 2A-4874។

ប្រភពដដែល បានបន្តថា​ មុនពេលកើតហេតុ គេឃើញជនរងគ្រោះបានធ្វើដំណើរ ពីកើតទៅលិច លុះដល់ចំណុចកើតហេតុ បានជ្រុលទៅបុកជនរងគ្រោះដែលកំពុងជិះកង់ រួចក៏រេចង្កូតទៅបុកគោយន្តចតចោលដែលបែរមុខទៅទិសខាងលិច បណ្តាលឲ្យនារីរងគ្រោះរបួសធ្ងន់ រួចបញ្ជូនទៅសង្រ្គោះបន្ទាន់ នៅមន្ទីរពេទ្យ ចំណែកម្ចាស់រថយន្តបានគេចខ្លួនបាត់ស្រមោល។

ក្រោយកើតហេតុ​ សមត្ថកិច្ចបាននាំយកវត្ថុតាងមករក្សាទុកនៅអធិការដ្ឋាននគរបាលស្រុកជីក្រែង ដើម្បីធ្វើការដោះស្រាយបន្តតាមផ្លូវច្បាប់បន្តទៀត៕