(បន្ទាយមានជ័យ)៖ នៅក្នុងឱកាសបុណ្យចូលឆ្នាំថ្មីប្រពៃណីជាតិ ឆ្នាំវក អដ្ឋស័ក ពុទ្ធសករាជ២៥៦០ នាព្រឹកថ្ងៃទី១០ ខែមេសា ឆ្នាំ២០១៦នេះ ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន ប្រធានក្រុមការងាររាជរដ្ឋាភិបាល ចុះពង្រឹងខេត្តបន្ទាយមានជ័យ អមដំណើរដោយក្រុមការងារ បានអញ្ជើញចុះសួរសុខទុក្ខ សំណេះសំណាល ជាមួយយោធិនពិការ ក្នុងមណ្ឌលអភិវឌ្ឍន៍យោធិនពិការ ៣១៧ តេជោ ភ្នំឆ័ត្រ។
លោកឧត្តមសេនីយ៍ទោ ទុយ ប៊ុនលី នាយកមណ្ឌល ៣១៧ តេជោ ភ្នំឆ័ត្រ បានឱ្យដឹងថា ចាប់តាំងពីឆ្នាំ២០១២ ដល់ឆ្នាំ២០១៦ មណ្ឌលបានទទួលបងប្អូនជនពិការ ឱ្យមករស់នៅ ចំនួន ៤៣៤គ្រួសារ។ ហើយដើម្បីផ្តល់នូវចំណេះដឹងដល់កូនចៅ បងប្អូនយោធិនមណ្ឌល បានស្ថាបនាសាលារៀន ១ខ្នង មាន ៦បន្ទប់ ដោយចាប់ពីថ្នាក់មតេយ្យ ដល់ថ្នាក់ទី៦ មានគ្រូ ៤នាក់ និងមានសិស្សចូលរៀន ចំនួន ២១០នាក់ និងស្រី ៨៩នាក់។
លោកនាយមណ្ឌល ៣១៧ បានលើកឡើងបន្ថែមទៀតថា សិស្សមួយចំនួន ជាកូនចៅយោធិន បានបង្ខំចិត្តបញ្ឈប់ការសិក្សា ត្រឹមថ្នាក់ទី៦ ព្រោះតែមិនមានលទ្ធភាពបន្តកាសិក្សាបាន ព្រោះតែសាលានៅឆ្ងាយ។ ថ្លែងសំណេះសំណាល នាឱកាសនោះ ឧបនាយករដ្ឋមន្ត្រី កែ គឹមយ៉ាន បានពាំនាំប្រសាសន៍សួរសុខទុក្ខ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ក្នុងឱកាសចូលឆ្នាំថ្មី ផ្តាំផ្ញើចំពោះបងប្អូនយោធិន និងបាននាំយកអំណោយ ជាគ្រឿងឧបភោគបរិភោគ និងថវិកាមួយចំនួន មកចែកជូនផងដែរ៕
មតិយោបល់