កំពង់ចាម: គម្រោងដាក់ឲ្យដេញថ្លៃសម្រាប់កិច្ចសន្យាការងារសាងសង់ផ្លូវបេតុងអារមេ១ខ្សែ នៅក្នុងឃុំកៀនជ្រៃ ស្រុកកំពង់សៀម ខេត្តកំពង់ចាម កាលពីព្រឹកថ្ងៃទី២៧ មេសា ២០១៦ កន្លងទៅថ្មីៗនេះ ដែលត្រូវបានគេសង្ស័យថា មានការឃុបឃិតគ្នាជាប្រព័ន្ធ ដើម្បីទាញយកផលប្រយោជន៍រៀងៗខ្លួននោះ ពេលនេះផ្លូវកំពុងតែចាប់ផ្ដើមស្ថាបនាទាំងខ្វះលក្ខណ:បច្ចេកទេស ដោយគ្មានការត្រួតពិនិត្យពីជំនាញពិតប្រាកដនោះឡើយ។
ដោយផ្លូវបេតុងអារមេ១ខ្សែប្រវែង១៤៥ម៉ែត្រ ទទឹង៤ម៉ែត្រ កម្ពស់១៥សង់ទីម៉ែត្រ តម្លៃប៉ាន់ស្មានដាក់ឲ្យដេញថ្លៃ ៥៣,២៨៥,៨០០រៀល ដែលត្រូវរ៉ូវគ្នាក្នុងតម្លៃខ្ពស់បំផុតគឺ ៥២,២០០,០០០រៀល ទាំងនេះដែលត្រូវបានគេមើលឃើញថា វាខុសប្លែកពីបណ្ដាឃុំស្រុកដទៃ ដែលតម្លៃការដេញថ្លៃគម្រោងរបស់គេចុះជាងពាក់កណ្ដាល គឺអាចសាងសង់ផ្លូវបាន១ទ្វេជា២ ឯណោះ។
ចំពោះការសាងសង់ផ្លូវវិញ គឺគេមិនបានបុកបង្ហាប់ដីទេ គ្រាន់តែបោសសម្អាតដីហើយលាយបេតុងចាក់ពីលើតែម្ដង កន្លែងខ្លះមានកម្ពស់ពី១២ទៅ១៣សង់ទីម៉ែត្រ ដោយប្រើដែក៨ មីលីម៉ែត្រចងយ៉ាងរង្វើលទៀតផង។
ប្រជាពលរដ្ឋក្នុងមូលដ្ឋានឃុំកៀនជ្រៃ បានសំណូមពរដល់ថ្នាក់ដឹកនាំខេត្ត មេត្តាចាត់តាំងជំនាញបច្ចេកទេសចុះទៅត្រួតពិនិត្យឲ្យបានត្រឹមត្រូវផង៕
មតិយោបល់