Post News Media ព័ត៌មានជាតិ ចេញពីខារ៉ាអូខ...

ចេញពីខារ៉ាអូខេ ស្រវឹងធ្លាក់ភ្នែក ត្រូវរថយន្ត បុករបួស២នាក់!

កណ្តាល: ករណី​គ្រោះថ្នាក់ចរាចរណ៍មួយបានកើតឡើង ​រវាងរថយន្ត បើកបុកម៉ូតូ បណ្តាលឲ្យរងរបួសធ្ងន់ស្រាល២នាក់ ​ត្រូវបញ្ជូនទៅព្យាបាល នៅមន្ទីរពេទ្យ​រាជធានីភ្នំពេញ។​

ហេតុការណ៍នេះបានកើតឡើង កាលពី​វេលាម៉ោង៩និង២០នាទីយប់ ​នៅ​ថ្ងៃច័ន្ទ ១៣កើត ខែមាឃ ឆ្នាំរកា នព្វស័កព.ស២៥៦១ ត្រូវនឹង​ថ្ងៃទី២៨ ខែមករា ឆ្នាំ២០១៨ ស្ថិត​លើផ្លូវជាតិលេខ១ ​ចន្លោះគីឡូម៉ែត្រលេខ២៦-២៧ ​ភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្តាល។

ជនរងគ្រោះមានឈ្មោះ សេង រ៉ាដា ភេទប្រុស អាយុ៣០ឆ្នាំ(រងរបួសធ្ងន់) ជនជាតិខ្មែរ មានទីលំនៅភូមិដីឥដ្ឋកោះផុស៣ ឃុំដីឥដ្ឋ ស្រុកកៀនស្វាយ ខេត្តកណ្តាល និងទី២ឈ្មោះ សៀង វ៉ាន់ថៃ ភេទប្រុស អាយុ២៥ឆ្នាំ ជនជាតិខ្មែរ(​របួសស្រាល)មានទីលំនៅភូមិដីឥដ្ឋកោះផុស២ ឃុំដីឥដ្ឋ ស្រុកកៀនស្វាយ ខេត្តកណ្តាល បានជិះម៉ូតូ​ម៉ាកសង់កូរ៉េ ពណ៌ក្រហម គ្មាន ពាក់ស្លាកលេខ។

មុនពេលកើតហេតុ គេឃើញរថយន្ត​មិនចាំម៉ាក បានធ្វើដំណើរទិសដៅពីអ្នកលឿង ឆ្ពោះទៅភ្នំពេញ ពេលបើកមកដល់ចំណុចកើតហេតុ ក៏បានបុកម៉ូតូជនរងគ្រោះ​ទើបចេញពីច្រៀង(ខារ៉ាអូខេ) នឹងកំពង់ជិះម៉ូតូក្នុងស្ថានភាពស្រវឹង រួចធ្វើដំណើរឆ្លងកាត់ផ្លូវជាតិ ទិសដៅពីត្បូងមកជើង ក៏​ត្រូវរថយន្តបុក​ពេញទំហឹង បណ្តាលឲ្យជនរងគ្រោះទាំងពីរដួលបោកក្បាល ទៅនឹងថ្នល់រងរបួសធ្ងន់​១នាក់ និងស្រាល​១នាក់។ ចំណែករថយន្តបង្ក​បើករត់គេចបាត់ចេញពីកន្លែងកើតហេតុ​៕