(ភ្នំពេញ)៖​ លោក​ ប្រាក់​ សុខុន​ រដ្ឋមន្ត្រីការបរទេស​ និងសហប្រតិបត្តិការអន្តរជាតិ ដែលទើបតែឡើងកាន់ថ្មី បានទទួលស្វាគមន៍​ លោកស្រី​ Bu Jian Guo​ ឯកអគ្គរដ្ឋទូតចិនប្រចាំកម្ពុជា​ ក្នុងជំនួបសម្តែងការគួរសម​ នៅព្រឹកថ្ងៃទី១២​ ខែមេសា​ ឆ្នាំ២០១៦​។

លោក ជុំ សុន្ទរី អ្នកនាំពាក្យ ក្រសួងការបរទេស​ និងសហប្រតិបត្តិការអន្តរជាតិ បានថ្លែងថា នៅក្នុងជំនួប រវាង លោកស្រី​ Bu Jian Guo​ ឯកអគ្គរដ្ឋទូតចិនប្រចាំកម្ពុជា​ ជាមួយលោក​ ប្រាក់​ សុខុន​ រដ្ឋមន្ត្រីការបរទេស​ និងសហប្រតិបត្តិការអន្តរជាតិ ដែលទើបតែឡើងកាន់តំណែងថ្មី ដោយបានពិភាក្សា ផ្លាស់ប្តូរយោបល់គ្នា ជុំវិញការពង្រឹងទំនាក់ទំនងទ្វេរភាគី រ​វាងប្រទេសទាំងពីរ ក៏ដូចជា ការពិភាក្សាទៅលើបញ្ហាតំបន់ និងបញ្ហាអន្តរជាតិ។

លោក ជុំ សុន្ទរី បន្តថា ក្នុងជំនួបនេះ ក៏បានពិភាក្សាគ្នា អំពីដំណើរទស្សនៈកិច្ច របស់លោក វ៉ាង យី រដ្ឋមន្រ្តីការបរទេសចិន មកកាន់កម្ពុជា នាពេលខាងមុខ។

លោកបន្ថែមថា លោកស្រី​ Bu Jian Guo ក៏បានជម្រាបលោករដ្ឋមន្រ្តីថ្មី ពីការឆ្លើយបត នូវការស្នើសុំរបស់សម្តេចតេជោ ហ៊ុន សែន ដែលឱ្យភាគីចិន បញ្ចេញទឹកចូលមកទន្លេមេគង្គ ដើម្បីរួមចំណែកដោះស្រាយ ដល់ភាពរាំងស្ងួត ដែលកំពុងកើតមាន នៅកម្ពុជា ក៏ដូចជានៅតាមបណ្តាប្រទេស មួយចំនួន។ តាមការស្នើសុំរបស់សម្តេចតេជោ ខាងរដ្ឋាភិបាលចិន បានសម្រេច បញ្ចេញទឹក ជាលើកទី៣ ចាប់ផ្តើមពីថ្ងៃទី១១ ខែមេសា ឆ្នាំ២០១៦ នេះ៕