ភ្នំពេញៈ បុរសជាជាងផ្សាដែកម្នាក់ខណៈឡើងលើរន្ទា រអិលធ្លាក់ជង់ចម្រឹងដែកចំឆ្អឹងជំនីធ្លាយពីម្ខាងទៅម្ខាង បណ្តាលឲ្យស្លាប់នៅកន្លែងយ៉ាងអាណោចអាធ័ម ម្នាក់ទៀតរបួសស្រាល។

ហេតុការភ្ញាក់ផ្អើលនេះបានកើតឡើងកាលពីវេលាម៉ោង៧និង៣០នាទីព្រឹកថ្ងៃទី៣០ ខែមីនា ឆ្នាំ២០១៨ ស្ថិតក្នុងការដ្ឋានមួយកន្លែង ក្រុម១ ភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

ជនរងគ្រោះមានឈ្មោះ ផល ធារ៉ា ភេទប្រុស អាយុ២១ឆ្នាំ មុខរបរ ជាផ្សាដែក ស្នាក់នៅការដ្ឋានសំណង់ខាងលើ មានស្រុកកំណើតនៅភូមិព្រែកប្រា ឃុំព្រែកឬស្សី ស្រុកល្វាឯម ខេត្តកណ្តាល។

ម្នាក់ទៀតរបួសស្រាលឈ្មោះ សុខ ក្រឹត ភេទប្រុស អាយុ១៧ឆ្នាំ មុខរបរជាងផ្សាដែក ស្នាក់នៅជាមួយគ្នា មានស្រុកកំណើតនៅខេត្តកោះកុង។

ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុពួកគេទាំង២នាក់បានឡើងលើរន្ទាដែកបំណងចាប់វីសជញ្ជាំងស័ង្កសីឃ្លាំងដែលមានកម្ពស់ប្រមាណ៧ម៉ែត្រដែក រន្ទាមានកម្ពស់ជិត១០ម៉ែត្រ ខណៈដែលបុរសរងរបួសស្រាលបានឡើងដល់លើមុនរួចហើយបុរសដែលបាត់បង់ជីវិតបានឡើងតាមក្រោយ។ ខណៈឡើងបានកម្ពស់ប្រម៉ាណ៧ម៉ែត្រក៏បាក់ជើងរន្ទារអិលរលំដួលធ្លាក់ចុះមកក្រោមចំដែកចម្រឹងថ្នាំងអំពៅទំហំ១០លី ចំឆ្អឹងជំនីខាងឆ្វេងធ្លាយមកម្ខាងទៀតក្រោមក្លៀកខាងស្តាំនិងម្នាកទៀតរបួសស្រាល។ ហើយភ្លាមៗនោះត្រូវបានអ្នកធ្វើការជាមួយរាយការណ៍ប្រាប់សមត្ថកិច្ចមូលដ្ឋានឲ្យហៅរថយន្តដឹកទៅសង្គ្រោះនៅមន្ទីរពេទ្យ។

ប្រភពបន្តថាខណៈដែលរថយន្តសាមុយមកដល់កន្លែងកើតហេតុ ជាអកុសលជនរងគ្រោះរបួសធ្ងន់ពេកជនរងគ្រោះបានដាច់ខ្យាល់ស្លាប់បាត់ទៅហើយ។
ក្រោយពេលកើតហេតុសមត្ថកិច្ចមូលដ្ឋានបានទាក់ទងសមត្ថកិច្ចជំនាញមកធ្វើកោសល្យវិច័យ បន្ទាប់ពីធ្វើកោសល្យវិច័យរួចសមត្ថកិច្ចបានប្រគល់សពឲ្យក្រុមគ្រសារយកទៅធ្វើបុណតាមប្រពៃណី៕