ព័ត៌មានជាតិ

ក្រុមពន្លត់អគ្គិភ័យ​២នាក់​ មានបញ្ហាថប់ដង្ហើម ពេលចូលទៅពន្លត់អគ្គិភ័យដែលកំពុងឆេះនៅក្នុងអាគារ​ខារ៉ាអូខេ​ កូប្រាហ្គោល!

ភ្នំពេញ: សេចក្ដីរាយការណ៍បានឲ្យដឹងថា​ គិតត្រឹមម៉ោង១យប់ឈានចូលថ្ងៃទី២១នេះ ផ្សែងនៅតែបន្តហ៊ុយចេញពីក្នុងអាគារ​ខារ៉ាអូខេ​ កូប្រាហ្គោល នៅឡើយទេ បើទោះបីមានកិច្ចអន្តរាគមន៍បាញ់ពន្លត់ររបស់កម្លាំង​សមត្ថកិច្ច ក៏ដូចជាក្រុមពន្លត់អគ្គិភ័យ និងរថយន្តពន្លត់អគ្គិភ័យជាច្រើនគ្រឿងយ៉ាងណាក៏ដោយ ។

អគ្គិភ័យខាងលើនេះកើតឡើងកាលពីវេលាម៉ោង១២និង១០នាទី រំលងអធ្រាត្រ​ ឈានចូលថ្ងៃ​ទី​២១ ខែមេសា​ ឆ្នាំ​២០១៨នេះ នៅត្រង់ចំណុចអាគារខារ៉ាអូខេ កូប្រាហ្គោល តាមបណ្ដោយផ្លូវលេខ២៥៤ កែងផ្លូវ ៥១ ស្ថិតក្នុងសង្កាត់ចតុមុខ ខណ្ឌដូនពេញ​ រាជធានីភ្នំពេញ​។

ចំណែកភ្នាក់ងារពន្លត់អគ្គិភ័យ​ ២នាក់ ​ជួបបញ្ហាថប់ដង្ហើម ខណ:ពេលអស់ខ្យល់​អុកស៊ីហ្សែន​ ក្នុងពេលចូលទៅបាញ់ពន្លត់ ខាងក្នុងអាគារ​ខារ៉ាអូខេ​ កូប្រាហ្គោល ដែលកំពុងឆាបឆេះបន្ទប់ជាន់ខាងលើ ខណ:នេះមានរថយន្តសង្គ្រោះបន្ទាន់ បានទៅដល់កន្លែងកើតហេតុហើយ ។

មូលហេតុបណ្តាលឲ្យមានផ្សែងហ៊ុយចេញពីក្នុងខារ៉ាអូខេកូប្រានោះគឺដោយសារតែឆ្លងចរន្តអគ្គិសនីទុស្សេបណ្តាលឲ្យមានផ្សែងយ៉ាងខ្មួលខ្មាញ់ ហើយអគ្គិភ័យ​ខាងលើបានរលត់ទៅវិញទាំងស្រុងនៅវេលាម៉ោង៣ទៀបភ្លឺ​ ថ្ងៃដដែលនេះ​ ដោយប្រើប្រាស់រថយន្តពន្លត់អគ្គិភ័យអស់ប្រហែលជា១០គ្រឿងជាង៕

មតិយោបល់