ភ្នំពេញៈ ករណីគ្រោះថ្នាក់ចរាចរណ៍បង្កឡើងដោយរថយន្ត NISSAN​ មួយគ្រឿង​ របស់ក្រុមហ៊ុនស្រាបៀរ​ GANZBERG បើកដោយបុរសម្នាក់​ស្រវឹងស្រា ​ដំណើរក្នុងល្បឿនយ៉ាងលឿន ទៅបុក​កង់បីឥណ្ឌា​ ហើយរុញទៅបុករទេះលក់សាច់អាំង និងម៉ូតូធំ FZ មួយគ្រឿងទៀត បណ្តាលឲ្យបែកកញ្ចក់ខ្ទាតសាច់ពេញផ្លូវ និងរងការខូចខាតយ៉ាងដំណំ បង្កការភ្ញាក់ផ្អើលទាំងយប់​ផងដែរ។

ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោងជិត១រំលងអធ្រាត្រ ឈានចូលថ្ងៃទី៨ ខែកញ្ញា​ ឆ្នាំ២០១៨ ត្រង់ចំណុចមុខខារ៉ាអូខេឌីយ៉ាម៉ង តាមបណ្តោយផ្លូវ២១៧ សង្កាត់ដង្កោ​ ខណ្ឌដង្កោ​ រាជធានីភ្នំពេញ ។

តាមសម្ដីអ្នកលក់សាច់អាំងបានប្រាប់ថា នៅមុនពេលកើតហេតុ រូបគាត់បានបើករទេះលក់គ្រឿងក្លែមរបស់គាត់មកឈប់ចតអែបចិញ្ចើមផ្លូវ ដើម្បីដាក់លក់សាច់គោអាំងដូចសព្វដង ហើយក៏មានបុរសម្នាក់ បើក​កង់បីឥណ្ឌា​ (Pass App) មកឈប់អែបក្បែររទេះលក់របស់គាត់ ដើម្បីទិញសាច់យកទៅក្លែម ហើយក៏មានម៉ូតូធំមួយគ្រឿងទៀត ម៉ាក FZ ពណ៌ខ្មៅ ទុកនៅជិតនោះដែរ លុះមកដល់វេលាកើតហេតុខាងលើ ស្រាប់តែមានរថយន្តម៉ាក NISSAN របស់ក្រុមហ៊ុន​ស្រាបៀរ​ GANZBERG ពាក់ស្លាកលេខ ភ្នំពេញ 2Y-1135 បើកបរតាមបណ្ដោយផ្លូវ២១៧ ទិសដៅពីត្បូងទៅជើង ក្នុងល្បឿនយ៉ាងលឿន​ មិនបានបង្អន់ល្បឿន ក៏បានជ្រុលទៅបុក​កង់បីឥណ្ឌា​នោះយ៉ាងពេញទំហឹងហើយ ក៏ខ្ទាត រុញទៅបុករទេះលក់សាច់អាំង និងម៉ូតូធំ FZ មួយគ្រឿងទៀត បណ្តាលឲ្យបែកកញ្ចក់ខ្ទាតសាច់ពេញផ្លូវ និងរងការខូចខាតយ៉ាងដំណំ បង្កការភ្ញាក់ផ្អើលទាំងយប់​ផងដែរ​ តែសំណាងល្អ មិនបង្កឲ្យមានមនុស្សរងរបួសនោះទេ។

ក្រោយពេលកើតហេតុភាគីទាំងសងខាងចរចាគ្នាមិនត្រូវទើបសមត្ថកិច្ចមូលដ្ឋានទាក់ទងសមត្ថកិច្ចជំនាញ ចុះមកធ្វើការវាស់វែងនឹងស្ទូចយករថយន្តទាំង២គ្រឿង យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំដោះស្រាយតាមនិតិវិធីច្បាប់ ៕