ភ្នំពេញ: រថយន្ត Lexus 470 ពន្លះទ្រូងផ្លូវលាន់ដូចរន្ទះហើយបន្តទៅបុកផ្ទះប្រជាពលរដ្ឋបណ្ដាលឲ្យរថយន្តរងការខូចខាតយ៉ាងដំណំ តែសំណាងល្អមិនបណ្ដាលឲ្យនរណារងរបួសឡើយ។
ហេតុការណ៍នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោងជាង២ថ្ងៃទី១៧ ខែវិច្ឆិកា ឆ្នាំ២០១៨ ដែលមានទីតាំងស្ថិតនៅតាមបណ្ដោយផ្លូវសហព័ន្ធរុស្ស៊ីស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញរថយន្តមួយគ្រឿងម៉ាក Lexus 470 ពណ៌ខ្មៅ ពាក់ស្លាកលេខ ភ្នំពេញ 2N-3923 បើកបរដោយបុរសម្នាក់បានធ្វើដំណើរក្នុងទិសដៅពីកើតទៅលិច លុះមកដល់ចំណុចស្តុបក្ដាន់២រថយន្តបានជ្រុលទៅបុកក្បាលនាគពុះចែកទ្រូងពេញទំហឹងចំណែកឯរថយន្តខ្ទាតទៅបុកចូលផ្ទះប្រជាពលរដ្ឋបណ្ដាលឲ្យរថយន្តនិងរបងផ្ទះប្រជាពលរដ្ឋរងការខូចខាតយ៉ាងដំណំ។
ក្រោយកើតហេតុសមត្ថកិច្ចជំនាញធ្វើការវាស់វែងយករថយន្តបង្កទៅតក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរង់ចាំដោះស្រាយគ្នាទៅតាមផ្លូវច្បាប់៕
មតិយោបល់