ភ្នំពេញ: បុរសដែលជាកម្មកររោងចក្រម្នាក់ផឹកស្រាស្រវឹង ខឹងប្រពន្ធមកផ្ទះមុន បើកម៉ូតូ គេចរថយន្តផុតជ្រុលទៅបុកបង្កាន់ដៃស្ពាន បណ្តាលឲ្យរងរបួសធ្ងន់ បង្កឲ្យមានការភ្ញាក់ផ្អើលកាលវេលម៉ោង៦នឹង៣៥នាទីយប់ ថ្ងៃទី២៨ ខែវិច្ឆិកា ឆ្នាំ២០១៨ នៅតាមបណ្ដោយផ្លូវ បេតុង ជាប់របងវត្តសម្ពលីហៅវត្តភ្នៀត ដែលស្ថិតនៅសង្កាត់ស្នោរ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះ ណយ ភេទប្រុស អាយុ៣៣ឆ្នាំ មុខរបរ កម្មកររោងចក្រ រស់នៅភូមិ ឧសភា សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។
ជនរងគ្រោះជិះម៉ូតូ ម៉ាកឌ្រីមសង់ ស៊េរី២០០៩ ពណ៌ខ្មៅ ពាក់ស្លាកលេខ តាកែវ1D-4338 បើកបរក្នុងទិសដៅពីកើតទៅលិច។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញជនរងគ្រោះជិះម៉ូតូចេញពីរោងចក្រ គោលដៅ ទៅផ្ទះវិញ បន្ទាប់មកជនរងគ្រោះបើកបរក្នុងស្ថានភាពស្រវឹងផង បានរេ ចង្កូតបុកបង្កាន់ដៃស្ពានបណ្តាលឲ្យបែកម៉ាស៊ីនខ្ទេចនិងរងរបួសធ្ងន់ល្មម ហើយជនរងគ្រោះ ត្រូវបានប្រជាពលរដ្ឋស្គាល់គ្នា ដឹកយកទៅសង្គ្រោះនៅមន្ទីរពេទ្យឯកជនជិតកន្លែងកើតហេតុភ្លាមៗផងដែរហើយ។ ចំណែកប្រពន្ធដឹងថា ប្តីមានគ្រោះថ្នាក់ បានមកដល់កន្លែងកើតហេតុភ្លាមៗផងដែរ។
បើតាមដម្តីជនរងគ្រោះ បាននិយាយប្រាប់ថា រូបគាត់ស្រវឹងស្រាតិចតួចទេតែខឹងនឹងប្រពន្ធរបស់ខ្លួន ដែលជិះម៉ូតូជាមួយប្អូនមកមុន មិនចាំគាត់ឌុប ហើយគាត់ខឹងពេក តូចចិត្តខ្លួនឯង បើកម៉ូតូទាំងស្មារតីមិននឹងនរ បានបើកម៉ូតូគេចពីរថយន្ដ ហើយរេចង្កូតទៅបុកបង្កាន់ដៃស្ពានតែម្តង។
បើតាមសម្តីឪពុកក្មេកជនរងគ្រោះខាងលើ បាននិយាយប្រាប់ថាកូនស្រី របស់គាត់ពោះធំជិតគ្រប់ខែទៅហើយ ហើយជារៀងរាល់ថ្ងៃជនរងគ្រោះ នឹងប្រពន្ធរបស់ខ្លួន ដឹកគ្នាចេញពីរោងចក្រ ជារៀងរាល់ថ្ងៃផងដែរ តែសំណាងល្អ ថ្ងៃកើតហេតុ កូនស្រី របស់គាត់ មិនបានឌុបគ្នា ដោយឲ្យប្អូនប្រុស ឌុបមកផ្ទះមុន។
ក្រោយពេលកើតហេតុបន្ទាប់ពីជនរងគ្រោះសម្រាកនៅមន្ទីរពេទ្យ ហើយ ចំណែកម៉ូតូត្រូវបានសមត្ថកិច្ចនគរបាលប៉ុស្តិ៍សង្កាត់ស្នោរបានប្រគល់ឲ្យឪពុកក្មេកនៅកន្លែងកើតហេតុភ្លាមៗផងដែរ៕
មតិយោបល់