ភ្នំពេញៈ ករណីបង្កការភ្ញាក់ផ្អើលមួយ ដោយបុរសម្នាក់ បានបង្រៀនក្មួយបើករថយន្ត ដល់ពេលស្លន់ពេក ស្រាប់តែច្រទ្បំហ្គែបថាជាហ្វ្រាំងជាន់ន្ថែម មានអីរថយន្តហោះរំលងសួនច្បារកណ្តាលទ្រូងផ្លូវ ទៅប៉ះអ្នកជិះម៉ូតូសង់កូរ៉េ បណ្តាលឲ្យរងរបួសធ្ងន់។
ហេតុការនេះ កើតទ្បើងកាលពីម៉ោង ៨និង២០នាទីយប់ថ្ងៃទី១៥ ខែធ្នូ ឆ្នាំ២០១៨ ត្រង់ចំណុចផ្លូវហាណូយ កែងទំនប់កប់ស្រូវ ភូមិត្រពាំងរងចាស់ សង្កាត់ឃ្មួញ ខណ្ឌសែនសុខ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុឃើញបុរសម្នាក់ បានបង្រៀនក្មួយបើករថយន្តCAMRY ពណ៌ស្លែ ពាក់ស្លាកលេខភ្នំពេញ 2A-9671 លើផ្លូវហាណូយ មានទិសដៅពីត្បូងទៅជើង ខណៈមកដល់ចំណុចខាងលើ ស្រាប់តែឃើញរថយន្ត ហោះរំលងសួនច្បារ កណ្តាលទ្រូងផ្លូវមកផ្លូវម្ខាងទៀត បណ្តាលឲ្យទៅប៉ះនឹងម៉ូតូអាសង់កូរ៉េ ពណ៌ក្រហម ពាក់ស្លាកលេខស្វាយរៀង 1D-6375 ដែលបើកពីជើងទៅត្បូង បណ្តាលឲ្យអ្នកជិះម៉ូតូ ដួលរងរបួសធ្ងន់ ភ្លាមៗរថយន្តសង្គ្រោះគ្លីនិកឯកជន ដឹកយកទៅសង្គ្រោះបាត់។
ក្រោយហេតុការណ៍ អ្នកបើករថយន្តបង្ក បានគេចខ្លួនបាត់ នៅសល់តែពូ ដែលជាអ្នកបង្រៀន ត្រូវសមត្ថកិច្ចហៅ យកមកសាកសួរនៅអធិការដ្ឋាននគរបាលខណ្ឌសែនសុខ ចំណែកម៉ូតូរងគ្រោះ និងរថយន្ត ត្រូវបានយកមករក្សាទុកនៅប៉ុស្តិ៍ ដើម្បីរង់ចាំការដោះស្រាយ៕
មតិយោបល់