កំពត: ជនសង្ស័យបរទេស ២នាក់ និងស្ត្រីខ្មែរម្នាក់ ត្រូវបានសមត្ថកិច្ចឃាត់ខ្លួន ក្រោមបទសង្ស័យថា មានជាប់ពាក់ព័ន្ធនឹងក្រុមជួញគ្រឿងញៀនបន្ទាប់ពីរឃើញវត្ថុតាងយ៉ាងច្រើនសន្ធឹកសន្ធាប់ កាលពីរសៀលថ្ងៃទី១៨ ខែធ្នូ ឆ្នាំ២០១៨។
ប្រតិបត្តិការនេះ បានធ្វើឡើងនៅក្បែរមន្ទីរប្រៃណីយ៍ និងទូរគមនាគមន៍ខេត្តកំពត ស្ថិតក្នុងភូមិ១ឧសភា សង្កាត់កំពង់កណ្តាល ក្រុង/ខេត្តកំពត ។
ជនសង្ស័យខាងលើ៖ ទី១.ឈ្មោះ តាសដឺលែន អូនដឺ ( Tasdelen Onder ) ភេទប្រុស អាយុ ៣៧ឆ្នាំ ទី២.ឈ្មោះ អែនចឺឡា អូរីប្យាណូវណា ( Anjerla Oribjanovna ) ភេទស្រី អាយុ ២៩ឆ្នាំ និងទី៣.ឈ្មោះ មុំ សុភា អាយុ ២៨ឆ្នាំ រស់នៅភូមិកំពង់បាយខាងជើង សង្កាត់កំពង់បាយ ក្រុងកំពត ខេត្តកំពត។
សមត្ថកិច្ច បានឲ្យដឹងថា ប្រតិបត្តិការនេះ បានធ្វើទ្បើងនៅទីតាំងខាងលើ ដោយបានធ្វើការឆែកឆែរលើជនបរទេសប្រុសស្រីពីរនាក់ រួមទាំងស្ត្រីខ្មែរម្នាក់។ ជាលទ្ធផលរកឃើញទឹកថ្នាំសង្ស័យថា ជាសារធាតុញៀនមួយកញ្ចប់ធំ ជាមួយគ្រឿងញៀនប្រភេទអ៊ិចស្ត្រាស៊ីលចំនួន១,៥០៣គ្រាប់។
បន្ទាប់ពីរកឃើញវត្ថុតាង និងឃាត់ជនសង្ស័យទាំងបីនាក់នោះ សមត្ថកិច្ចបានបន្តទៅឆែកឆេរហាង FIREFLY ស្ថិតក្នុងភូមិទ្វីខាងជើង សង្កាត់អណ្តូងខ្មែរក្រុងកំពត ដោយរកឃើញគ្រឿងញៀនមេតំហ្វេតាមីន៥០០គ្រាប់ រួមទាំងប្រភេទថ្នាំសង្ស័យជាសារធាតុញៀន១៨០គ្រាប់ និងម៉ាទឹកកកទម្ងន់២៦៤,៨៦ក្រាមបន្ថែមទៀត៕
មតិយោបល់