Post News Media ព័ត៌មានជាតិ លម្អិត! ឃាត់ខ...

លម្អិត! ឃាត់ខ្លួនមន្ត្រីយោធា និងមន្ត្រីរដ្ឋបាលព្រៃឈើ៤នាក់ ក្រោយដេញកៀររថយន្តស៊ាំយ៉ុងជ្រុលទៅបុកផ្ទះប្រជាពលរដ្ឋ ស្លាប់និងរបួសជាច្រើននាក់ ខណ:អ្នកកាសែតនិងមន្ត្រីយោធា៣នាក់ទៀតកំពុងរត់គេចខ្លួន

មណ្ឌលគិរី: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថានៅវេលា​ម៉ោង​១០និង​៣០នាទីយប់ កម្លាំង​ជំនាញ​ព្រហ្មទណ្ឌ​ខេត្ត សហការ​ជាមួយ​កម្លាំង​អធិការដ្ឋាន​នគរបាល​ស្រុក​កែវ​សីម៉ា និង​កម្លាំង​កងរាជអាវុធហត្ថ​ស្រុក​កែវ​សីម៉ា បានធ្វើការ​ឃាត់ខ្លួន​ជនសង្ស័យ​ចំនួន​០៤​នាក់ ដែល​បាន​បើករថយន្ត​ប្រដេញ និង​កៀរ​រថយន្ត​សាំ​យ៉ុង បណ្តាល​ឲ្យ​ជ្រុល​ចង្កូត​ចូលទៅ​បុក​ផ្ទះ និង​បុក​មនុស្ស​ស្លាប់​០១​នាក់ រងរបួស​៣​នាក់ កាលពី​ថ្ងៃទី​២៧ ខែធ្នូ ឆ្នាំ​២០១៨ វេលា​ម៉ោង​០៦​និង​៣០​នាទី នៅ​ភូមិ​ត្រពាំង​ផ្អេ ឃុំ​ស្រែ​ខ្ទម ស្រុក​កែវ​សីម៉ា ។​

​ជនសង្ស័យ​ទាំង​៤​នាក់ មានឈ្មោះ ៖ ១.​យូ រ៉ាវុធ ភេទ​ប្រុស អាយុ​៥១​ឆ្នាំ មុខ​របរ​យោធា​, ២.​វ៉ាន់ រួន ភេទ​ប្រុស​ អាយុ​៥៤​ឆ្នាំ​, ៣.​ស្រ៊ុន ឈួន ភេទ​ប្រុស អាយុ​៤៣​ឆ្នាំ មុខរបរ មន្ត្រីរដ្ឋបាល​ព្រៃឈើ និង​៤.​សៀង ចំ​រ៉ុង ភេទ​ប្រុស អាយុ​៣៥ ឆ្នាំ ។ បច្ចុប្បន្ន ជនសង្ស័យ​ទាំង​០៤​នាក់​ត្រូវបាន​ឃាត់ខ្លួន ដើម្បី​កសាង​សំណុំរឿង​បញ្ជូនទៅ​សាលាដំបូង​ខេត្ត​តាម​នីតិវិធី ។​

​ដោយឡែក ជនសង្ស័យ​ជនសង្ស័យ​ចំនួន​៣​នាក់​ទៀត ដែល​រត់គេចខ្លួន​រួមមាន ៖ ១.​សៅ សំណាង ភេទ​ប្រុស អាយុ​២៥ ឆ្នាំ មុខរបរ​អ្នកសារព័ត៌មាន ជា​អ្ន​កបើកឡាន​ប្រដេញ និង​កៀរ​រថយន្ត​បណ្តាលឲ្យ​ជ្រុល​ចូលទៅ​បុក​ផ្ទះ​និង​បុក​មនុស្ស​ស្លាប់ កំពុង​រត់គេចខ្លួន​, ២.​សៅ រ៉ានី ភេទ​ប្រុស មុខរបរ​អ្នកសារព័ត៌មាន កំពុង​រត់គេចខ្លួន និង​៣.​ប៉ុង កា​នួ​ត ភេទ​ប្រុស អាយុ​៤៣​ឆ្នាំ មុខរបរ​យោធា កំពុង​រត់គេចខ្លួន ។

​ចំពោះ​ជនសង្ស័យ​ដែល​រត់គេចខ្លួន​ទាំង​០៣​នាក់​នេះ កម្លាំង​សមត្ថកិច្ច​កំពុង​តាម​ចាប់ខ្លួន ដើម្បី​យកមក​ផ្តន្ទាទោស​តាមច្បាប់ ៕