កណ្ដាល: ប្រពន្ធទ្រាំនឹងប្ដីវាយធ្វើបាបលែងបាន សម្រេចចិត្តប្ដឹងសមត្ថកិច្ច ឲ្យចាប់ខ្លួនយកទៅដាក់គុក ដោយសារតែពូកែរករឿងឈ្លោះប្រកែក ប្រើអំពើហិង្សាក្នុងគ្រួសារញឹកញាប់ពេក។
ករណីនេះ កើតឡើងកាលពីវេលាម៉ោង១១និង៣០នាទី ថ្ងៃទី០៥ ខែកក្កដា ឆ្នាំ ២០១៦ នៅចំណុចភូមិដុល ឃុំសន្លុង ស្រុកខ្សាច់កណ្ដាល ខេត្តកណ្ដាល។
នគរបាលស្រុកមុខកំពូល បានឲ្យដឹងថា ជនល្មើសជាប្ដីត្រូវឃាត់ខ្លួន ឈ្មោះ គង់ គា ហៅ ឡាក់ ភេទប្រុស អាយុ៤៤ឆ្នាំ(ប្តី) ជនជាតិខ្មែរ មុខកសិករមានទីលំនៅភូមិ ឃុំកើតហេតុ។ ចំណែក ជនរងគ្រោះឈ្មោះ លឹង លី ភេទស្រី អាយុ៤៩ ឆ្នាំ(ប្រពន្ធ) ជនជាតិខ្មែរ មុខរបរកសិករ មានទីលំនៅភូមិឃុំកើតហេតុ មានរបួសស្នាម មុតនៅបាតដៃឆ្វេង០១កន្លែង និងហើមជាំភ្លៅឆ្វេង។ វត្ថុតាងចាប់យកបានរួមមាន៖ ១.ដំបងឫស្សី មួយកំណាត់ប្រវែង១,២៥ ម៉ែត្រ ២.ដំបងឈើមួយកំណាត់ប្រវែង០,៥៥ ម៉ែត្រ។
នគរបាល ប្រាប់ឲ្យដឹងទៀតថា កន្លងមកជនល្មើសឧស្សាហ៍ប្រើអំពើហិង្សាក្នុងគ្រួសារ ដោយវាយដំលើជនរងគ្រោះជាញឹកញាប់ ហើយសមត្ថកិច្ចបានធ្វើការអប់រំណែនាំឲ្យជនល្មើសធ្វើកិច្ចសន្យាម្តងរួចមកហើយ តែនៅតែមិនកែខ្លួន។
ជាក់ស្តែង កាលពីវេលាម៉ោង១១និង៣០នាទី នៅថ្ងៃទី០៥ ខែកក្កដា ឆ្នាំ២០១៦ ជនល្មើស ឈ្មោះ គង់ គា ផឹកស្រាស្រវឹង ហើយបានមកសុំលុយពីប្រពន្ធឈ្មោះ លឹង លី យកទៅផឹកស្រាបន្តទៀត តែប្រពន្ធមិនឲ្យ ភ្លាមនោះឈ្មោះ គង់ គា ស្ទុះទៅយកដំបងឈើមួយកំណាត់វាយលើឈ្មោះ លឹង លី ឃើញដូច្នេះឈ្មោះ លឹង លី បានចាប់ដំបងនេះ បណ្តាលឲ្យមុតរយះបាតដៃឆ្វេង មួយកន្លែង របួសចេញឈាមបន្ទាប់មក ឈ្មោះ គង់ គា បានទៅយកដំបងឫស្សីមួយកំណាត់ទៀត វាយលើឈ្មោះ លឹង លី ត្រូវចំភ្លៅឆ្វេង បណ្តាលឲ្យរបួសហើមជាំ ក្រោយមកជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលសន្លុង។ ក្រោយមក កម្លាំងសមត្ថកិច្ចចុះអន្តរាគមន៍ឃាត់ខ្លួន ឈ្មោះគង់ គា បញ្ជូនមកកាន់អធិការដ្ឋាននគរបាលស្រុកខ្សាច់កណ្តាល ដើម្បីអនុវត្ត តាមនីតិវិធី៕
មតិយោបល់