កំពង់ធំៈ យុវតីសិស្សអាយុ១៤ឆ្នាំម្នាក់ បានស្លាប់ភ្លាមៗនៅនិងកន្លែងកើតហេតុ និងម្នាក់ទៀតរងរបួសធ្ងន់បាក់ជើងខាងស្ដាំ បន្ទាប់រថយន្តកាមរីឆ្លាមបើកបុកម៉ូតូរបស់ជនរងគ្រោះ កាលពីរសៀលថ្ងៃទី៦ ខែកក្កដា ឆ្នាំ២០១៦ នៅចំណុចផ្លូវវាងភូមិកំពង់ថ្ម ឃុំកំពង់ថ្ម ស្រុកសន្ទុកខេត្តកំពង់ធំ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញយុវតីសិស្ស២នាក់ បានជិះម៉ូតូអាសង់សេ១២៥ ឌុបគ្នាទៅរៀនគួរនៅសាលាវិទ្យាល័យកំពង់ថ្ម ហើយទៅមិនទាន់ដល់សាលាផងក៏ត្រូវរថយន្តកាមរីឆ្លាមបើកបរបញ្ច្រាសទិសគ្នាពីជើងទៅត្បូងទាំងក្នុងស្ថានភាពស្រវឹងជោគជាំរេចង្កូតទៅបុកម៉ូតូពេញទំហឹង បណ្ដាលឲ្យស្លាប់ម្នាក់ភ្លាមៗនៅកន្លែងកើតហេតុ និងម្នាក់ទៀតរងរបួសធ្ងន់បាក់ជើងស្ដាំ ក្រោយពេលកើតហេតុគេបានឃើញសមត្ថកិច្ចចុះមកវាស់វែង ដើម្បីបញ្ជៀសការកកស្ទះចរាចរណ៍។

សមត្ថកិច្ចស្រុកសន្ទុកបានឲ្យដឹងថា ជនរងគ្រោះឈ្មោះ ទូច សីហា ភេទស្រី អាយុ១៤ឆ្នាំ ស្លាប់នៅនិងកន្លែងកើតហេតុរស់នៅភូមិដូង ឃុំបល្ល័ង្ក ស្រុកបារាយណ៍ ខេត្តកំពង់ធំ និងម្នាក់ទៀតត្រូវជាបងស្រីបង្កើតរងរបួសធ្ងន់បាក់ជើងស្ដាំអាយុ១៧ឆ្នាំរស់នៅភូមិឃុំជាមួយគ្នា ត្រូវបានដឹកបញ្ជូនបន្តទៅសង្គ្រោះនៅបន្ទីពេទ្យលោកសង្ឃក្រុងភ្នំពេញ ចំពោះអ្នកបើករថយន្តបង្ក និងអ្នករួមដំណើរទាំងពីរនាក់ ត្រូវបានសមត្ថកិច្ចឃាត់ខ្លួនយកមកសាកសួរនៅអធិការនគរបាលស្រុកសន្ទុក ដើម្បីចាត់ការបន្ត។

ប្រភពដដែលបានបន្តថា អ្នកបើកបររថយន្តបង្កឈ្មោះ ប៉ោង ភ័ណ្ណអាយុ២៣ឆ្នាំ រស់នៅភូមិដូងឃុំបល្ល័ង្ក ស្រុកបារាយណ៍ ខេត្តកំពង់ធំនិងរួមដំណើរឈ្មោះ ឃីង វិចិត្រ ភេទប្រុស អាយុ២៣ឆ្នាំរស់នៅភូមិឃុំជាមួយគ្នា។ ក្រោយពេលពីធ្វើការវាស់វែងរួចសមត្ថកិច្ចបានប្រមូលយកវត្ថុតាងបង្កហេតុទៅរក្សាទុកនៅអធិការដ្ឋាននគរបាលស្រុកសន្ទុក៕