រតនគិរីៈ កាលពីវេលាម៉ោង១១ព្រឹក ថ្ងៃទី១៩ ខែមករា ឆ្នាំ២០១៩ មានករណីគ្រោះថ្នាក់ចរាចរណ៍រវាងរថយន្តនិងម៉ូតូ បណ្តាលឲ្យមនុស្សម្នាក់ស្លាប់ នៅលើផ្លូវជាតិលេខ៧៨ ភូមិភ្នំ សង្កាត់យក្ខឡោម ក្រុងបានលុង។
ជនរងគ្រោះមានឈ្មោះ យ៉យ តុលា ភេទប្រុស អាយុ១៣ឆ្នាំ ជនជាតិទំពួន មុខរបរសិស្ស មានទីលំនៅភូមិឡាប៉ូ សង្កាត់យក្ខឡោម ក្រុងបានលុងខេត្តរតនគិរី(ស្លាប់) ជិះម៉ូតូម៉ាកអ៊ិចសិនធ័រ ពណ៌ខ្មៅ អត់ស្លាកលេខ។ ចំណែករថយន្តម៉ាកសាំយ៉ុង ពណ៌ស ពាក់ស្លាកលេខ ភ្នំពេញ2Q- បើកបរដោយឈ្មោះ ជា ប៊ុនធី ភេទប្រុស អាយុ៥១ឆ្នាំ ជនជាតិខ្មែរ មានទីលំនៅភូមិឡោមឃុំអណ្តូងមាស ស្រុកអណ្តូងមាស ខេត្តរតនគីរី មុខរបរអ្នករត់តាក់ស៊ី។
ក្រោយពេលកើតហេតុ សមត្ថកិច្ចជំនាញចរាចរណ៍ខេត្ត បានចុះទៅវាស់វែងយកម៉ូតូ និងរថយន្តទៅរក្សាទុកនៅការិយាល័យចរាចរណ៍នៃស្នងការនគរបាលខេត្តដើម្បីចាត់ការទៅតាមនិតិវិធីច្បាប់។ ចំណែកសាកសពត្រូវបានសមត្ថកិច្ចប្រគល់ជូនទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
មតិយោបល់