ព័ត៌មានជាតិ

ឃាត់ខ្លួន​ប្តី​ប្រពន្ធ​មួយគូ​ មុខសញ្ញា​សង្ស័យ​ក្នុង​អំពើ​ឆក់!

​ភ្នំពេញ: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា សមត្ថកិច្ច​នគរបាល​ខណ្ឌដូនពេញ ធ្វើការ​ស្រាវជ្រាវ​រហូត​ឈានទៅដល់​ការឃាត់​ប្តី​ប្រពន្ធ ជា​មុខសញ្ញា​សង្ស័យ​ក្នុង​អំពើ​ឆក់​ក្នុង​រាជធានី​ភ្នំពេញ ។ ប្រតិបត្តិការ​នេះ​ធ្វើឡើង​កាលពី​វេលា​ម៉ោង ១២​និង​៣០​នាទី ថ្ងៃទី​២១ ខែមករា ឆ្នាំ​២០១៩ ដែល​ស្ថិតនៅ​ចំណុច​ផ្ទះ​លេខ​៤៩Eo ស្ថិតក្នុង​បន្ទប់​លេខ​១ ជាន់​ទី​១ ផ្លូវ​លេខ​៩០ សង្កាត់​វត្តភ្នំ ខណ្ឌដូនពេញ រាជធានី​ភ្នំពេញ​។

​លោក​វរសេនីយ៍ឯក ទៀង ច័ន្ទ​សារ អធិការនគរបាល​ខ​ណ្ឌ​ដូនពេញ បាន​ឲ្យ​ដឹងថា ក្នុង​ប្រតិបត្តិការ​ស្រាវជ្រាវ​រហូត​ឈានទៅដល់​ការកំណត់​បាន​នូវ​មុខសញ្ញា​ឆក់​ទាំង ២​នាក់​ប្តី​ប្រពន្ធ​នេះ កម្លាំង​នគរបាល​ជំនាញ​បានធ្វើ​ការដកហូត​នូវ​សម្ភារ:ប្រើប្រាស់​គ្រឿងញៀន​មួយចំនួន រួមជាមួយ​នឹង​ថង់​ច្រក​សម្រាប់​គ្រឿងញៀន​មួយចំនួន​ផងដែរ​។​

លោក​អធិការ​បន្តថា ជនសង្ស័យ​ជា​ប្តី​ឈ្មោះ សុខ ភា​រុន អាយុ ២១​ឆ្នាំ មុខរបរ មិន​ពិតប្រាកដ មាន​ស្រុកកំណើត​នៅ​ស្រុក​អូររាំងឪ ខេត្តកំពង់ចាម និង​ប្រពន្ធ​ឈ្មោះ ស៊ិន ស្រី​ម៉ី ហៅ​យ៉ា អាយុ ២២​ឆ្នាំ មុខរបរ ធ្វើការ​នៅ​ហាង​បា​បារាំង មាន​ស្រុកកំណើត​នៅ​ភូមិ​ព្រែក​ពោធិ៍ ឃុំ​ព្រែក​ពោធិ៍ ស្រុក​ស្រី​សន្ធរ ខេត្តកំពង់ចាម ស្នាក់នៅ​ផ្ទះកើតហេតុ​ខាងលើ​។​

បច្ចុប្បន្ន ជនសង្ស័យ​ទាំង​២​នាក់ ត្រូវបាន​នគរបាល​ខ​ណ្ឌ​ដូនពេញ ធ្វើការ​សាកសួរ​ដើម្បី​កសាង​សំណុំរឿង​អនុវត្តតាម​នីតិវិធី៕

មតិយោបល់