ភ្នំពេញ: គ្រឿងចក្រកាយដីអ៊ិចស្កាវទ័រមួយគ្រឿង ធ្វើដំណើរចេញពីហ្គារ៉ាសជួសជុល រួចក៏បើកឡើងលើរថយន្តស្ទូចមួយគ្រឿងទៀត ដោយមិនប្រយ័ត្ន បណ្តាលឲ្យទាក់ខ្សែភ្លើង ដែលអូសកាត់ទទឹងផ្លូវទាញបាក់បង្គោលភ្លើងអស់មួយដើម កាលពីវេលាម៉ោង១០យប់ ថ្ងៃទី៣០ ខែមករា ឆ្នាំ២០១៩ត្រង់ចំណុចខាងលិចស្តុបច្រកចូលផ្សារទំនើបអ៊ីអន២ ប្រមាណ៥០០ម៉ែត្រ តាមបណ្ដោយផ្លូវឧកញ្ញ៉ាម៉ុងរិទ្ធី ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុគេឃើញបុរសម្នាក់ បានបើកបរគ្រឿងចក្រអ៊ិចស្ការវទ័រមួយគ្រឿង ចេញពីក្នុងហ្គារ៉ាសជួសជុលគ្មានយីហោ នៅត្រង់ចំណុចកើតហេតុខាងលើ។ ពេលនោះគ្រឿងចក្រខាងលើ ក៏បានបើកឡើងលើរថយន្តមួយគ្រឿងទៀតម៉ាក MITSUBISHI ពណ៌ស ជាប្រភេទរថយន្តបួនភ្លៅរបស់ក្រុមហ៊ុន រាជសីហ៍ ឡូជីស្ទីក ពាក់ស្លាកលេខ ភ្នំពេញ3A-6875 ដែលកំពុងឈប់ចតនៅលើចិញ្ចើមផ្លូវត្រង់ចំណុចកើតហេតុដើម្បីដឹកគ្រឿងចក្រខាងលើ។ នៅពេលបើកឡើងលើរថយន្តដឹកខាងលើរួច គ្រឿងចក្រនោះ ក៏បានបង្វែរប្រមោយបែរទៅខាងក្រោយ ដើម្បីកុំឲ្យប៉ះជាមួយនិងកាប៊ីនរថយន្តដឹកខាងលើ។ ខណ:នោះ ដោយអ្នកបើកបរគ្រឿងចក្រខ្វះការប្រុងប្រយ័ត្ន ក៏បង្វែរប្រមោយទៅទាក់និងខ្សែភ្លើងដែលអូសកាត់ទទឹងផ្លូវ បណ្ដាលឲ្យទាញបង្គោលភ្លើងមួយដើមបាក់ ពាក់កណ្តាលធ្លាក់ខ្សែភ្លើងចុះមកក្រោម តែមិនបានបង្កឲ្យមាននរណាម្នាក់រងរបួសនោះ គ្រាន់តែធ្វើឲ្យចរន្តអគ្គិសនីផ្ទះរបស់ប្រជាពលរដ្ឋមួយចំនួនដាច់ និងបង្កឲ្យមានការកកស្ទះចរាចរណ៍តែប៉ុណ្ណោះ។
ក្រោយពេលកើតហេតុសមត្ថកិច្ចមូលដ្ឋាន ក៏ចុះមកធ្វើការអន្តរាគមន៍ ហើយក៏បានទាក់ទងទៅសមត្ថកិច្ចជំនាញ ឲ្យចុះមកធ្វើការយករថយន្តបង្កខាងលើទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំធ្វើដោះស្រាយ ជាមួយអគ្គិសនីកម្ពុជា ទៅតាមផ្លូវច្បាប់នៅពេលក្រោយ៕
មតិយោបល់