ភ្នំពេញ: បុរសម្នាក់បានស្លាប់ភ្លាមៗ នៅកន្លែងកើតហេតុ ខណ:បុរសម្នាក់ទៀតរងរបួស កំពុងសង្គ្រោះនៅគ្លីនិកឯកជន បន្ទាន់ពីជិះម៉ូតូមួយគ្រឿងឌុបគ្នាដួលខ្លួនឯង កាលពីវេលាម៉ោង១ និង៥០នាទីរំលងអធ្រាត្រ ឈានចូលថ្ងៃទី១៩ ខែកុម្ភ: ឆ្នាំ២០១៩ ត្រង់ចំណុចទល់មុខវត្តសុវណ្ណមុនីវង្ស (ហៅវត្តអន្លង់ក្ងាន) តាមបណ្ដោយផ្លូវហាណូយ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឮសំទ្បេងដួលអូសយ៉ាងខ្លាំង ពេលនោះក៏មានប្រជាពលរដ្ឋដែលរស់នៅជិតកន្លែងកើតហេតុ ចេញពីក្នុងផ្ទះមកមើល ស្រាប់តែឃើញបុរសទាំងពីរនាក់ខាងលើ កំពុងដេកដួលស្តូកស្តឹងនៅផ្លូវដោយមានរងរបួសឈាមស្រោចពេញខ្លួន រួមទាំងម៉ូតូមួយគ្រឿងម៉ាក ហុងដាភីស៊ីអ៊ិច ពណ៌ស ពាក់ស្លាកលេខ ភ្នំពេញ1HE-9856 ដែលរងការខូចខាតផ្នែកខាងមុខយ៉ាងដំណំ ដួលនៅក្បែរនោះផងដែរ។
ភ្លាមៗនោះប្រជាពលរដ្ឋ ក៏បានរាយការណ៍ទៅរថយន្តសង្គ្រោះបន្ទាន់ និងសមត្ថកិច្ចមូលដ្ឋាន ឲ្យចុះមកធ្វើការអន្តរាគមន៍ជួយសង្គ្រោះ។ បន្ទាន់មកក៏មានរថយន្តសង្គ្រោះបន្ទាន់ របស់គ្លីនិកឯកជនសម្ភពរស្មីបានចុះមកធ្វើការដឹកបុរសម្នាក់ ដែលរងរបួសបែកច្រមុះសន្លប់ស្ដូកស្ដឹងយកទៅសង្គ្រោះភ្លាមៗ។
ដោយទ្បែកជាអរកុសលបុរសម្នាក់ទៀត គឺរងរបួសរយះ.កនិងបែកក្បាល បានដាក់ខ្យល់ស្លាប់ភ្លាមៗ ខណ:ដែលរថយន្តសង្គ្រោះបន្ទាន់បានចុះមកដល់។
សមត្ថកិច្ចជំនាញ បានឲ្យដឹងថា នៅមុនពេលកើតហេតុជនរងគ្រោះទាំងពីរនាក់ បានបើកបរម៉ូតូខាងលើ ធ្វើដំណើរពីត្បូងទៅជើងតាមបណ្ដោយផ្លូវហាណូយ ក្នុងល្បឿនយ៉ាងលឿន។ លុះមកដល់ចំណុចកើតហេតុទំនងម៉ូតូខាងលើ បានអក់ហ្សើនិងអ្វីមួយ រួចក៏ចាប់ហ្វ្រាំង បណ្តាលឲ្យបោកដួលអូសជិត២០០ម៉ែត្រតែម្ដងទៅ។
សពបុរសរងគ្រោះ មិនទាន់ស្គាល់អត្តសញ្ញាណនោះទេ គឺមានវ័យប្រហែល៣០ឆ្នាំ។
ក្រោយពេលកើតហេតុសមត្ថកិច្ច ជំនាញចុះបានធ្វើការវាស់វែង យកម៉ូតូរបស់ជនរងគ្រោះ ទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរង់ចាំប្រគល់ទៅសាច់ញាតិជនរងគ្រោះ នៅពេលក្រោយ។
ដោយឡែកសពបុរសរងគ្រោះ ត្រូវបានសមត្ថកិច្ចដឹកយកទៅតម្កល់នៅក្នុងវត្តទឹកថ្លា ដើម្បីស្វែងរកសាច់ញាតិឲ្យមកទទួលយកទៅធ្វើបុណ្យទៅតាមប្រពៃណី៕
មតិយោបល់