ភ្នំពេញ: បុរសម្នាក់សង្ស័យស្រវឹងធ្លាក់ភ្នែក បើករថយន្តលុចស៊ីសRX330មួយគ្រឿងបោះពួយយ៉ាងលឿនដូចហោះទៅដល់ផ្លូវបំបែកជាពីរ ដោយមិនខ្ចីកាច់ចង្កូតបត់ ក៏សម្រុកទៅមុខទៅនិងរបងសាលាបឋមសិក្សាភ្នំពេញថ្មីទាំងកម្រោល បង្កឲ្យមានការភ្ញាក់ផ្អើលកាលពីវេលាម៉ោង១១និង៣០នាទីយប់ ថ្ងៃទី១៥ ខែមិនា ឆ្នាំ២០១៩ ត្រង់ចំណុចតាមបណ្ដោយផ្លូវហាណូយកែងនិងផ្លូវ២៨គ្រួសារ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេឃើញបុរសម្នាក់ស្រវឹងជោគជាំបើកបររថយន្តមួយគ្រឿងម៉ាក លុចស៊ីសRX330 ពណ៌ស្ករ ពាក់ស្លាកលេខ ភ្នំពេញ 2AS-5562។ ដោយធ្វើដំណើរតាមបណ្ដោយផ្លូវ២៧គ្រួសារ ក្នុងទិសដៅពីលិចទៅកើត ក្នុងល្បឿនលឿនដូចហោះ លុះមកដល់ចំណុចកើតហេតុដែលជាផ្លូវបំបែកជាពីរ ស្រាប់តែអ្នកបើកបររថយន្តខាងលើងោកមួយផាំង ក៏ជ្រុលចង្កូតសម្រុកឆ្ពោះទៅមុខត្រង់ភ្លឹងទៅបុកទម្លុះរបងថ្មរបស់សាលាបឋមសិក្សាភ្នំពេញថ្មីទាំងកម្រោលបណ្តោយឲ្យបាក់អស់ពីរផ្ទាំងប្រវែងប្រមាណ១០ម៉ែត្រ ចំណែកឯរថយន្តបង្កបានធ្លាក់ចូលទៅក្នុងសាលារងការខូចខាតក្រពឹតមួយកំណាត់មុខប៉ុន្តែមិនបង្កឲ្យមានអ្នករងរបួសនោះទេ។ ភ្លាមៗនោះអ្នកបើកបររថយន្តបង្ក ក៏ព្យាយាមបើកគេចចេញពីក្នុងសាលាបឋមសិក្សាភ្នំពេញថ្មីវិញ តែដោយរកផ្លូវចេញមិនរួចក៏ទុករថយន្តចោលនៅនិងកន្លែងកើតហេតុ ហើយគេចខ្លួនចេញទៅបាត់សម្រោលទៅ។
ក្រោយពេលកើតហេតុសមត្ថកិច្ចមូលដ្ឋាននិងជំនាញក៏បានចុះមកដល់កន្លែងកើតហេតុ ហើយក៏បានធ្វើការវាស់វែងនិងស្ទូចយករថយន្តបង្កខាងលើទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរងចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់នៅពេលក្រោយ៕
មតិយោបល់