ស្វាយរៀងៈ នៅម៉ោងប្រមាណ២រំលងអធ្រាត្រថ្ងៃទី ១២ ខែកក្កដានេះ មានគ្រោះថ្នាក់ចរាចរណ៍គួរឲ្យរន្ធត់មួយរវាងរថយន្ត lexus ស្លាកលេខភ្នំពេញ2AE-2386 បានបុកជាមួយម៉ូតូវ៉េវ ស្លាកលេខភ្នំពេញ1F-9955 បើកដោយឈ្មោះ ជិនសុខគង់ ជាងអគ្គីសនីបម្រើការងារនៅក្រុងបាវិត មានស្រុកកំណើត នៅភូមិឃ្លាំងប្រាក់ ឃុំផ្អេរ ខេត្តកំពង់ឆ្នាំង បណ្ដាលឲ្យស្លាប់ភ្លាមៗនៅនិងកន្លែង។

បើតាមសមត្ថកិច្ចបានឲ្យដឹងថា គ្រោះថ្នាក់ចរាចរណ៍នេះបណ្ដាលមកពីរថយន្តបង្កបើកក្នុងល្បឿនលឿនក្នុងទិសដៅស្របគ្នាជាមួយម៉ូតូ ហើយខ្វះការប្រុងប្រយត្ន័ ក៏បុកម៉ូតូពីក្រោយ ខ្ទាត់ជនរងគ្រោះចេញពីម៉ូតូបែកទ្រូង បាក់ជើងខ្ទិចនិងម៉ូតូឆេះយ៉ាងសន្ធោសន្ធៅសល់តែគ្រោងឆ្អឹង រីឯអ្នកបើបររថយន្តបង្កដាក់មេប្រូចបាត់ស្រមោល។

បច្ចុប្បន្នសពជនរងគ្រោះតម្កល់ទុកនៅវត្តស្វាយជ្រំ រង់ចាំគ្រួសារមកទទួលយកទៅធ្វើបុណ្យតាមប្រពៃណី៕