កំពង់ឆ្នាំងៈ បុរស២នាក់ កម្មករក្រុមហ៊ុនអគ្គិសនី ខេត្តកំពង់ឆ្នាំង បានឡើងតខ្សែភ្លើងនៅលើបង្គោលភ្លើងមិនមានការប្រុងប្រយ័ត្ន ឆក់របួសធ្ងន់ម្នាក់ និងម្នាក់របួសស្រាល កាលពីវេលាម៉ោង១០និង១០នាទីព្រឹកថ្ងៃទី១៦ ខែកក្កដា ឆ្នាំ ២០១៦នេះ នៅតាមផ្លូវកៅស៊ូ ក្នុងភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។

នគរបាលក្រុងកំពង់ឆ្នាំងបានឲ្យដឹងថា កម្មកររងគ្រោះទាំង២នាក់ ទី១.ឈ្មោះ លី ចាន់ធឿន អាយុ២៥ឆ្នាំ របួសធ្ងន់ ជាប់នៅលើបង្គោលភ្លើង រស់នៅភូមិអាឡែង ឃុំជ្រៃបាក់ ស្រុករលាប្អៀរ និងទី២ឈ្មោះ ហ៊ិន កក្កដា អាយុ៣០ឆ្នាំ របួសស្រាល ស្នាក់នៅក្នុងភូមិទី២ សង្កាត់ខ្សាម ក្រុងកំពង់ឆ្នាំង។

ករណីនេះ ត្រូវបានលោក ស រនាថ មេការក្រុមហ៊ុនអគ្គីសនី បានបញ្ជាក់ថា មុនពេលឲ្យកម្មករឡើងតខ្សែភ្លើង នៅលើបង្គោលភ្លើងនោះ គឺក្រុមហ៊ុន បានបិតចរន្តអគ្គិសនីនៅតាមលីញទៅផ្សារក្រោមរួចហើយ។ ប៉ុន្តែជាធម្មតានៅពេលចរន្តភ្លើងក្រុមហ៊ុនបានផ្តាច់ ប្រជាពលរដ្ឋដែលមានម៉ាស៊ីនភ្លើង នៅតាមផ្ទះ ដែលចាំបាច់ត្រូវប្រើភ្លើង គឺគាត់ត្រូវបញ្ឆេះម៉ាស៊ីនភ្លើងនៅតាមផ្ទះរាប់រយខ្នងផ្ទះ ដើម្បីប្រើភ្លើង ហេតុនេះហើយទើបចរន្តភ្លើងបានឆ្លងពីតាមផ្ទះណាមួយ ទៅខ្សែភ្លើងតាមបង្គោលភ្លើងវិញ ធ្វើឲ្យកម្មករទាំង២នាក់ កំពុងឡើងតភ្លើងឆក់ចរន្តភ្លើងនោះ រងរបួសតែម្តង គឺកម្មករម្នាក់ បានឆក់សន្លប់នៅលើបង្គោលភ្លើងតែម្តង។

ក្រោយពេលកើតហេតុ គេឃើញគ្រឿងចក្រមួយគ្រឿង បានលាប្រមោយ ដងសន្ទូចរបស់ខ្លួនឲ្យកម្មករម្នាក់ ឡើងទៅចងផ្អោប កម្មកររងគ្រោះយកមកក្រោម ដាក់លើរថយន្តសង្គ្រោះ ដឹកកម្មកររងគ្រោះ មកសង្គ្រោះនៅក្នុងមន្ទីរពេទ្យបង្អែក ខេត្តកំពង់ឆ្នាំង៕