ភ្នំពេញៈ ជនសង្ស័យម្នាក់ក្នុងចំណោមបក្ខពួក២នាក់ ត្រូវកម្លាំងនគរបាលប៉ុស្តិ៍ផ្សារកណ្ដាលទី១ ធ្វើការឃាត់ខ្លួនភ្លាមៗ ក្រោយជនរងគ្រោះបានប្តឹងពីការបាត់ម៉ូតូ ខណៈនោះឃើញក្រុមជនសង្ស័យកំពុងដោះស្លាកលេខម៉ូតូ ក៏ត្រូវសមត្ថកិច្ចឃាត់ខ្លួនបានម្នាក់តែម្តងកាលពីវេលាម៉ោង១៦និង១០នាទីរសៀលថ្ងៃទី១៩ ខែកក្កដា ឆ្នាំ២០១៦ នៅចំណុចមុខផ្ទះលេខ៣៣អឺ០ ផ្លូវលេខ១៧៨ ភូមិទី២ សង្កាត់ជ័យជំនះ ខណ្ឌដូនពេញ។

សមត្ថកិច្ចបានឲ្យដឹងថា ជនសង្ស័យឈ្មោះម៉ៅ សុភា ហៅវ៉ែន ភេទប្រុស អាយុ៣៤ឆ្នាំ មុខរបរនិងទីកន្លែងមិនពិប្រាដក។ ចំណែកឯបក្ខពួកម្នាក់ទៀតដែលរត់គេចខ្លួនបាត់នោះឈ្មោះសឹង ភេទប្រុស អាយុប្រហែល៣៤ឆ្នាំ ។ រីឯជនរងគ្រោះឈ្មោះសំ ដេ ភេទប្រុស អាយុ២៩ឆ្នាំ មុខរបរចុងភៅ ស្នាក់នៅផ្ទះលេខ៣២អឺ៣ ផ្លូវលេខ១៤៨ សង្កាត់ផ្សារកណ្ដាលទី១ ខណ្ឌដូនពេញ។

មន្រ្តីនគរបាលមូលដ្ឋានបានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូ១គ្រឿងម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ 1AD-6796 ចេញពីធ្វើការនៅហាងទន្លេសាប ទៅលេងផ្ទះមិត្តភក្តិនៅជាន់ទី១ ម្ដុំផ្សារកណ្ដាល នៅកន្លែងកើតហេតុ ដោយបានទុកម៉ូតូនៅខាងក្រោម។ លុះដល់ម៉ោងកើតហេតុខាងលើជនរងគ្រោះបានចុះមកក្រោមវិញ ស្រាប់តែបាត់ម៉ូតូតែម្តង រួចខ្លួនបាត់ទៅប្តឹងនគរបាលប៉ុស្តិ៍ជ័យជំនះ ភ្លាមនោះសមត្ថកិច្ចបានចុះទៅកន្លែងកើតហេតុ និងធ្វើការស្រាវជ្រាវក្នុងមូលដ្ឋាន រហូតរកឃើញក្រុមជនសង្ស័យកំពុងដោះស្លាកលេខម៉ូតូនៅចំណុចមូលដ្ឋានសង្កាត់ផ្សារកណ្តាល១ហើយចាប់ឃាត់ខ្លួនបានម្នាក់ និងដកហូតបានម៉ូតូ២គ្រឿង មួយគ្រឿងម៉ាកស្ទេប ពណ៌ខ្មៅ ពាក់ស្លាកលេខភ្នំពេញ1CE-0188 និងមួយគ្រឿងទៀតម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ1AD-6796 ជារបស់ជនរងគ្រោះ ។

បច្ចុប្បន្នជនសង្ស័យត្រូវបានឃុំខ្លួននៅអធិការនគរបាលខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់៕