ភ្នំពេញៈ កម្លាំងសមត្ថកិច្ចរបស់មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ បានធ្វើការឃាត់ខ្លួនជនសង្ស័យស្រីប្រុស៦នាក់ ដែលប្រតិបត្តិការនេះ បង្កឲ្យមានការផ្ទុះអាវុធ១គ្រាប់ នៅខណៈដែលសមត្ថកិច្ចដកហូតបានថ្នាំញៀនតែចំនួន៣គ្រាប់។

សេចក្ដីរាយការណ៍បឋមពីភ្នាក់ងារ Post News ឲ្យដឹងថា ប្រតិបត្តិការបង្ក្រាបករណីជួញដូរគ្រឿងញៀននេះ ធ្វើឡើងនៅវេលាម៉ោង១៖២០នាទី រសៀលថ្ងៃទី២៦ ខែកក្កដា ឆ្នាំ២០១៦ នៅខាងក្រោយអតីតរោងភាពយន្តគិរីរម្យ ត្រង់ចំណុចផ្ទះលេខ២៦ ផ្លូវលេខ១១៣ ស្ថិតក្នុងសង្កាត់បឹងកេងកងទី១ ខណ្ឌចំការមន រាជធានីភ្នំពេញ។ ជនសង្ស័យ៦នាក់ ត្រូវបានឃាត់ខ្លួន ក្នុងនោះស្រីម្នាក់ និងដកហូតបានថ្នាំញៀនចំនួន៣គ្រាប់។

ក្រោយប្រតិបត្តិការ ជនសង្ស័យទាំង៦នាក់ខាងលើ ត្រូវបានបញ្ជូនទៅមន្ទីរប្រឆាំងគ្រឿង នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ដើម្បីធ្វើការសាកសួរបន្ថែម និងកសាងសំណុំរឿងតាមនីតិវិធី៕