កំពង់ចាមៈ កាលពីថ្ងៃទី១៧ ខែមករា ឆ្នាំ២០២០ វេលាម៉ោង ៧ និង ៣០នាទីយប់ លើកំណាត់ផ្លូវជាតិលេខ៧ ស្ថិតភូមិស្រង៉ែត្បួង ឃុំស្រង៉ែ ស្រុកព្រៃឈរ ខេត្តកំពង់ចាម មានករណីគ្រោះថ្នាក់ចរាចរណ៍មួយកើតឡើង។

ដំណើររឿង៖ មុនពេលពេលកើតហេតុ គេឃើញម៉ូតូម៉ាក គុបមូល ពណ៌ខៀវ គ្មានស្លាកលេខ បើកបរដោយឈ្មោះ ជា បសអ៊ឺន ភេទប្រុស អាយុ ៣៩ ឆ្នាំ មានទីលំនៅភូមិមេមាំង ឃុំល្វា ស្រុកព្រៃឈរ ខេត្តកំពង់ចាម បើកក្នុងល្បឿនលឿនទិសដៅពីត្បូងទៅជើង ខណៈមកដល់ចំណុចខាងលើបានជ្រុលទៅបុករថយន្តម៉ាក ហ៊ីយ៉ាន់ដាយ ពណ៌សលាយខៀវ ពាក់ស្លាកលេខ កំពង់ចាម ៣A-១០៩៥ បើកបរដោយឈ្មោះ ខ្នា កែវឡាយ ភេទប្រុស អាយុ ២៧ ឆ្នាំ មានទីលំនៅភូមិក្រឡា ឃុំក្រឡា ស្រុកកំពង់សៀម ខេត្តកំពង់ចាម ទិសដៅពីលិចទៅកើត បណ្ដាលឲ្យអ្នកបើកបរម៉ូតូស្លាប់មួយរំពេច។

ក្រោយកើតហេតុ សមត្ថកិច្ចបានចុះដល់ទីតាំងធ្វើការវាស់វែង យកវត្ថុតាងទៅរក្សាទុកនៅអធិការដ្ឋាននគរបាល ដើម្បីចាត់ការតាមនីតិវិធី ចំណែកសពជនរងគ្រោះប្រគល់ឲ្យគ្រួសារយកទៅធ្វើបុណ្យតាមប្រពៃណី៕