ភ្នំពេញៈ រថយន្ដហ៊ាយឡែនឌ័រមួយគ្រឿង បើកក្នុងស្ថានភាពស្រវឹងបុករះម៉ូតូនិងតូបលក់បាយ បណ្ដាលឲ្យបុរស២នាក់រងរបួសធ្ងន់ កាលពីវេលា១៖៣០នាទីយប់រំលងអាធ្រាត្រ ឈានចូលថ្ងៃទី៣១ ខែកក្កដា ឆ្នាំ២០១៦ ជិតផ្សារតូចតាមបណ្ដោយលេខ៩៣ ស្ថិតក្នុងសង្កាត់ទួលសង្កែរ ខណ្ឌឫស្សីកែវ។
តាមប្រភពព័ត៌មានពីកន្លែងកើតហេតុបានឲ្យគេដឹងថា មុនពេលកើតហេតុ គេយើញបុរស២ ជិះរថយន្ដហ៊ាយឡែនឌ័រមួយគ្រឿង ពណ៌ប្រផេះ ពាក់ស្លាកលេខភ្នំពេញ2AC-9766 ជិះយ៉ាងលឿងចេញពីហាងមួយកន្លែង ក្នុងស្ថានភាពស្រវឹង ខណៈមកដល់ចំណុចកើតហេតុ រថយន្ដក៏ជិះទៅបុកម៉ូតូម៉ាកវីវាមួយគ្រឿងយ៉ាងពេញទំហឹង បណ្ដាលឲ្យបុរសម្នាក់រងរបួសធ្ងន់ ហើយរថយន្ដមិនព្រមឈប់ក៏ជិះបន្ដទៅបុកតូបអ្នកលក់បាយ បណ្ដាលឲ្យបុរសអ្នកលក់បាយម្នាក់រងរបួសធ្ងន់ត្រូវរថយន្ដដឹងយកទៅសង្គ្រោះនៅមន្ទីរពេទ្យភ្លាមៗ។ ចំណែកអ្នកបើករថយន្តបង្ក ភ្លាមនោះត្រូវប្រជាពលរដ្ឋឃាត់ខ្លួនបាននៅចំណុចកើតហេតុខាងលើ រួចក៏ត្រូវប្រជាពលរដ្ឋស្វាគមន៍ម្នាក់មួយដៃមួយជើង ទើបប្រគល់ឲ្យសមត្ថកិច្ច។
ក្រោយពេលកើតហេតុ សមត្ថកិច្ចចុះមកដល់ចំណុចកើតហេតុ នាំជនបង្កទៅប៉ុស្ដិ៍នគរបាលសង្កាត់ទួលសង្កែរ ដើម្បីធ្វើការសាកសួរ និងដោះស្រាយតាមនិតិវិធី៕
មតិយោបល់