កំពង់ស្ពឺៈ នៅថ្ងៃទី៨ ខែមីនា ឆ្នាំ២០២០ វេលាម៉ោង ១០និង១០នាទីយប់ មានករណីគ្រោះថ្នាក់ចរាចរណ៍រវាងរថយន្តបុកជាមួយម៉ូតូ។

ដំណើររឿង៖ មុនពេលកើតហេតុ មានរថយន្ត ១គ្រឿង ម៉ាកសាំយ៉ុង ពណ៌ស ពាក់ផ្លាកលេខ ភ្នំពេញ 2M-1895 បើកបរដោយឈ្មោះ ជា ជូណាត ហៅបៅ ភេទប្រុស អាយុ ២៩ឆ្នាំ មានទីលំនៅភូមិអន្លង់សង្កែ ឃុំតាសាល ស្រុកឱរ៉ាល់ ខេត្តកំពង់ស្ពឺ បើកបរក្នុងស្ថានភាពស្រវឹង1.00mg/L(តេស្តក្រោយកើតហេតុ) ធ្វើដំណើរពីត្បូងទៅជើង លុះដល់ចំណុចកើតហេតុ ស្រាប់តែបើកចូលចំណែកផ្លូវម្ខាងទៀតទៅបុកម៉ូតូ ១គ្រឿង ម៉ាក ហុងដាឌ្រីម សេ១២៥ ស៊េរីឆ្នាំ២០១៥ ពាក់ផ្លាកលេខ ភ្នំពេញ1CU-5455 អ្នកបើកបរឈ្មោះ សុង សៀកគួ អាយុ ១៩ឆ្នាំ (ស្លាប់) មានទីលំនៅភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ រួមដំណើរជាមួយឈ្មោះ ប៊ុណ្ណា វឌ្ឍនា (រងរបួសស្រាល) ភេទប្រុស អាយុ ១៩ឆ្នាំ មានទីលំនៅភូមិពាម ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងឈ្មោះ រៀម ភេទប្រុស អាយុ ១៨ឆ្នាំ (រងរបួសធ្ងន់) មិនទាន់ស្គាល់ឈ្មោះ ធ្វើដំណើរពីជើងទៅត្បូង។

ក្រោយកើតហេតុរថយន្ត និងអ្នកបើកបររថយន្តខាងលើ ត្រូវបានឃាត់រក្សាទុកជាបណ្ដោះអាសន្ន នៅអធិការដ្ឋាននគរបាលស្រុកឱរ៉ាល់ ដើម្បីកសាងសំណុំរឿងតាមនីតិវិធី ចំណែកសពប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី រីឯអ្នករងរបួសធ្ងន់ បញ្ជូនទៅសម្រាកព្យាបាលនៅមន្ទីរពេទ្យ៕