ផ្ទះ ព័ត៌មានជាតិ កុំចេះតែហ៊ាន ...

កុំចេះតែហ៊ាន ប្រយ័ត្ន​អញ​វ៉ៃ​ងាប់​ដូច​ឆ្មា! យុវជន​ម្នាក់​ផឹកស៊ី​ស្រវឹង​វ៉ៃ​បំផ្លាញ​ទ្រព្យសម្បត្តិ​ក្នុងផ្ទះ ​និង​ជេរ​ប្រមាថ​ឪពុក​ ត្រូវ​បាន​សមត្ថកិច្ចឃាត់ខ្លួន​

0

​ពោធិ៍សាត់: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា កាលពី​យប់​ថ្ងៃ​ទី​២៨​ ខែកក្កដា​ ឆ្នាំ​២០២០​ វេលា​ម៉ោង​២៣​នឹង​១៥​នាទី​ មាន​យុវជន​ម្នាក់​ផឹកស៊ី​ស្រវឹង​វ៉ៃ​បំផ្លាញ​ទ្រព្យសម្បត្តិ​ក្នុងផ្ទះ​ ជេរ​ប្រមាថ​ឪពុក​ និង​បងប្អូន​បង្កើត​របស់​ខ្លួន​ នៅ​ចំណុច​ផ្ទះ​របស់​ឈ្មោះ​ អៀន​ អ៊ី​ន​ ត្រូវជា​ឪពុក​បង្កើត​ជន​មុខសញ្ញា​ អាយុ​៥៨​ឆ្នាំ​ ជនជាតិ​ខ្មែរ​ រស់នៅ​ភូមិ​ចំបក់​ធំ​ ឃុំ​ត្នោត​ជុំ​ ស្រុក​ក្រគរ​ ខេត្តពោធិ៍សាត់​ ត្រូវ​បាន​សមត្ថកិច្ច​នគរបាល​ស្រុក​ក្រគរ​ឃាត់ខ្លួន​ពី​បទ​ប្រើ​អំពើ​ហឹ​ង្សា​ក្នុង​គ្រួសារ​ តាម​បញ្ជា​របស់​ឯកឧត្តម​ កូយ​ កាន់​យ៉ា​ ព្រះរាជអាជ្ញា​អម​សាលាដំបូង​ខេត្តពោធិ៍សាត់​ ចុះ​ថ្ងៃ​ទី​២៩​ ខែកក្កដា​ ឆ្នាំ​២០២០​ វេលា​ម៉ោង​១៧​នឹង​១៣​នាទី​។​

​លោក​វរសេនីយ៍ឯក​ ឯម​ រុន​ អធិការ​នគរបាល​ស្រុក​ក្រគរ​បាន​ឲ្យ​ដឹង​ថា​ យោង​តាម​បណ្តឹង​របស់​បុរស​ឈ្មោះ​ អៀន​ អ៊ី​ន​ កាលពី​យប់​ថ្ងៃ​ទី​២៨​ ខែកក្កដា​ ឆ្នាំ​២០២០​ វេលា​ម៉ោង​២៣​នឹង​១៥​នាទី​ ខ្លួន​កំពុង​ដេក​នៅ​រោង​គោ​ខាងកើត​ផ្ទះ​ ស្រាប់តែ​កូនប្រុស​របស់​ខ្លួន​ឈ្មោះ​ អ៊ូ​ សម្បត្តិ​ មក​ពី​កន្លែង​ផឹកស៊ី​បាន​មក​ដល់​ផ្ទះ​បើកទ្វារ​ផ្ទះបាយ​ រក​បាយ​ហូប​ ក៏​បាន​បើក​គម្រប​ឆ្នាំងបាយ​បោះចោល​ ឮ​សូរ​ប្រាវ​ ពេល​នោះ​សត្វ​ឆ្មា​ក៏​ចូល​មក​ផ្ទះបាយ​ដែរ​ វា​ក៏​បាន​យក​ដំបង​វ៉ៃ​ឆ្មា​ងាប់​បោះចោល​ក្រោម​គ្រែ​ ខ្លួន​ក៏​បាន​ស្ទុះ​មើល​កូនប្រុស​របស់​ខ្លួន​ ពេល​នោះ​វា​បាន​និយាយ​ថា​ កុំ​ចេះ​តែ​ហ៊ាន​ ប្រយ័ត្ន​អញ​វ៉ៃ​ងាប់​ដូច​ឆ្មា​ ជាន់​ជើង​គ្នា​ពេញ​ផ្ទះ​ឥឡូវ​ អញ​ដុត​ផ្ទះ​ចោល​ឥឡូវ​ ធ្វើ​ក្ត​អី​អញ​ ពេល​នោះ​ខ្លួន​ក៏​ចូល​ដេក​វិញ​ទៅ​ ហើយ​កូនប្រុស​របស់​ខ្លួន​បាន​ដើរទៅ​កន្លែង​ទ្រុងមាន់​បាន​ចាប់​មាន់​១​យក​ទៅ​ស៊ីផឹក​បន្ត​ទៀត​។​

​បញ្ជាក់:​ រយ:កាល​កន្លង​មក​កូនប្រុស​របស់​ខ្លួន​ ពេល​មក​ពី​ផឹកស៊ី​ស្រវឹង​ បាន​ប្រមាថមើលងាយ​ខ្លួន​ នឹង​បងប្អូន​បង្កើត​ និង​បាន​វ៉ៃ​បំភ្លិច​បំផ្លាញ​ទ្រព្យសម្បត្តិ​នៅ​ក្នុងផ្ទះ​មាន​ដូច​ជា​៖​ ទូរទស្សន៍​,​ ពាងទឹក​,​ទូរស័ព្ទ​ដៃ​,​ គាស់​ទ្វារផ្ទះ​,​ វាយ​បំបែក​កញ្ចក់​បង្អួច​,​ កាប់​សត្វ​គោ​ នឹង​គំរាម​រក​ដុះ​ផ្ទះ​ចោល​។​

​លោក​អធិការ​នគរបាល​ស្រុក​ក្រគរ​បាន​ឲ្យ​ដឹង​ថា​ ជន​មុខសញ្ញា​ឈ្មោះ​ អ៊ូ​ សម្បត្តិ​ ភេទ​ប្រុស​ អាយុ​២៤​ឆ្នាំ​ ជនជាតិ​ខ្មែរ​ មាន​ទីលំនៅ​ភូមិ​ចំបក់​ធំ​ ឃុំ​ត្នោត​ជុំ​ ស្រុក​ក្រគរ​ ខេត្តពោធិ៍សាត់​ បាន​ប្រើ​ហឹ​ង្សា​ក្នុង​គ្រួសារ​ដោយ​ឥទ្ធិពល​ស្រវឹងស្រា​ ត្រូវ​បាន​សមត្ថកិច្ច​នគរបាល​ឃាត់ខ្លួន​នៅ​ អធិការដ្ឋាន​គ​របាល​ស្រុក​ក្រគរ​ ដើម្បី​រៀបចំ​នីតិវិធី​និង​បញ្ជូន​ទៅ​ផែនការ​ងារ​ព្រហ្មទណ្ឌ​នៃ​ ស្នងការដ្ឋាន​នគរបាល​ខេត្ត​ តាម​សំណូមពរ​ឪពុក​ម្តាយ​៕

មតិយោបល់