ភ្នំពេញ: យុវជន ២នាក់ បានរងរបួសធ្ងន់ និងស្រាល ដោយសារតែត្រូវរថយន្ត មិនស្គាល់ម៉ាក បើកបុកពេញទំហឹង កាលពីវេលាម៉ោង១១និង៣០នាទី យប់ ថ្ងៃទី២០ ខែមេសា ឆ្នាំ២០១៦ នៅចំណុចផ្លូវភ្លោះ ខាងកើតផ្សារធំថ្មី កែងនឹងមហាវិថីព្រះនរោត្ដម ស្ថិតក្នុងសង្កាត់ផ្សារថ្មី៣ ខណ្ឌដូនពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញយុវជន ២នាក់ ជិះម៉ូតូម៉ាក ស៊ុយសុគី និច ពណ៌ស ពាក់ស្លាកលេខ ភ្នំពេញ 1FE.3087 ឌុបគ្នា តាមបណ្ដោយផ្លូវមហាវិថីព្រះនរោត្ដម ទិសដៅពីត្បួងទៅជើង ក្នុងល្បឿនយ៉ាងលឿន ខណះមកដល់ចំណុចកើតហេតុ ដែលជាចំណុចផ្លូវកែង ហើយមិនបន្ថយល្បឿនផងនោះ ក៏ត្រូវរថយន្តមួយគ្រឿងទៀត មិនចាំម៉ាក បានបើកចេញពី ផ្លូវ១៣០ ទិសដៅពីកើតទៅលិច ក្នុងល្បឿនយ៉ាងលឿនដូចគ្នា ក៏ត្រូវរថយន្តបុកចំពីចំហៀងម៉ូតូ ពេញទំហឹង បណ្ដាលឲ្យយុវជនម្នាក់ជាអ្នកឌុប ដួលបោកក្បាលទៅនឹងថ្នល់ រងរបួសយ៉ាងធ្ងន់ធ្ងរ ចំណែកយុវជនម្នាក់ទៀត ដែលជិះពីក្រោយ រងរបួសស្រាល។

ប្រភពព័ត៌មានបានបន្តទៀតថា បន្ទាប់ពីបើកបុកម៉ូតូហើយនោះ រថយន្តបង្ក ក៏បានបន្ថែមល្បឿនបើកគេចខ្លួនបាត់ស្រមោលភ្លាមៗ ចេញពីកន្លែងកើតហេតុ តែម្ដង។ ក្រោយពេលកើតហេតុ រថយន្តសង្គ្រោះរបស់មន្ទីពេទ្យកាល់ម៉ែត្រ បានមកដឹកជនរងគ្រោះ ទៅកាន់មន្ទីរពេទ្យ ដើម្បីសង្គ្រោះ។ ចំណែកឯម៉ូតូជនរងគ្រោះវិញ បានរងការខូចខាត ផ្នែកខាងមុខទាំងស្រុង ហើយត្រូវបានសមត្ថកិច្ចមូលដ្ឋាន យកទៅរក្សាទុក នៅអធិការដ្ឋាននគរបាលខណ្ឌដូនពេញ រង់ចាំប្រគល់ឲ្យម្ចាស់វិញ៕