ភ្នំពេញៈ (ព័ត៌មានបឋម) នៅវេលាម៉ោង ៨និង៥៧នាទីព្រឹកថ្ងៃទី៩ ខែធ្នូ ឆ្នាំ២០២០ ស្ថិតតាមបណ្ដោយផ្លូវ២១៧ សង្កាត់ដង្កោ ខណ្ឌដង្កោ រាជធានីភ្នំពេញ ពិតជាមហាសំណាងមួយពាន់ដង យុវជន ២នាក់ លោតចេញពីម៉ូតូទាន់ ក្នុងករណីគ្រោះថ្នាក់ចរាចរណ៍ រវាងរថយន្តហ៊ីឌុបបុកម៉ូតូចូលក្រោមកង់ឡាន ។

រថយន្តបង្កម៉ាក ហ៊ីឌុប ពាក់ផ្លាកលេខ ភ្នំពេញ 3A-8405 បើកបរដោយបុរសម្នាក់។
ម៉ូតូរងគ្រោះម៉ាក និច ពាក់ផ្លាកលេខ ភ្នំពេញ 1FJ-8150 ជិះគ្នា ២នាក់ មិនស្គាល់អត្តសញ្ញាណ មានមុខរបរជាជាងពិដាន។

សូមបញ្ជាក់៖ ហេតុការណ៍នេះកើតឡើង ខណៈពេលពួកគេ ទើបចេញពីយកអីវ៉ាននៅកន្លែងធ្វើការ ត្រឡប់មកផ្ទះវិញ មិនទាន់ដល់ផ្ទះផង ស្រាប់រថយន្តខាងលើ បុកម៉ូតូចូលក្រោមរថយន្ត ប៉ុន្តែពិតជាមហាសំណាង ដែលពួកគេលោតចេញទាន់ ទើបបណ្ដាលឲ្យរងរបួសតិចតួចប៉ុណ្ណោះ។

ក្រោយពីកើតហេតុសមត្ថកិច្ច បានចុះដល់ទីតាំង វាស់វែងនិងទាញយកម៉ូតូចេញពីក្រោមឡានដាក់ខាង ដើម្បីសម្រួលចរាចរណ៍កុំឲ្យកក់ស្ទះ និងឲ្យភាគីទាំងពីរ ធ្វើការចរចាសម្របសម្រួលគ្នា ចុងក្រោយភាគីខាងរថយន្តបង់សំណងចំនួនទឹកប្រាក់ ១០០ដុល្លារ ឲ្យភាគីខាងម៉ូតូ ដើម្បីបញ្ចប់រឿងនៅហ្នឹងកន្លែងកើតហេតុ៕