ព័ត៌មានជាតិ

ករណីគ្រោះថ្នាក់ចរាចរណ៍! ជិះ​ម៉ូតូ​បុក​ដុំ​ថ្ម ​បណ្តាល​ឲ្យ​ដួល​បោក​នឹង​ថ្នល់​ស្លាប់​ស្រ្តីម្នាក់

​បាត់ដំបង:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ស្ត្រី​ម្នាក់​បាន​ស្លាប់​បាត់បង់​ជីវិត​នៅ​កន្លែង​កើតហេតុ​ ក្នុង​ឧបទ្ទវហេតុ​គ្រោះថ្នាក់​ចរាចរណ៍​ បង្ក​ដោយសារ​បុរស​ម្នាក់​បើក​ម៉ូតូ​ខ្វះ​ការ​ប្រុង​ប្រយ័ត្ន​បុក​ដុំ​ថ្ម​នៅ​លើ​ផ្លូវ​ បណ្តាល​ឲ្យ​ដួល​បោក​ទៅ​នឹង​ថ្នល់​ ។​

​ហេតុការណ៍​នេះ​កើតឡើង​នៅ​ថ្ងៃ​ទី​០៨​ ខែកុម្ភ:​ ឆ្នាំ​២០២១​ វេលា​ម៉ោង​១៩​និង​០០​នាទី​ នៅ​ចំណុច​ក្រុម​ទី​៣០​ ភូមិ​កកោះ​ ឃុំ​កកោះ​ ស្រុក​មោងឫស្សី​ ខេត្តបាត់ដំបង​ លើ​ផ្លូវជាតិ​លេខ​៥​ ចន្លោះ​គីឡូម៉ែត្រ​លេខ​២៥១-២៥២​ ។

​សមត្ថកិច្ច​បាន​ឲ្យ​ដឹង​ថា​ មុន​ពេល​កើតហេតុ​ មាន​ម៉ូតូ​មួយ​គ្រឿង​ម៉ាក​ហុងដា​ឌ្រី​ម​ ពណ៌​ខ្មៅ​ ស៊េរី​១២៥​ ស៊េរី​ឆ្នាំ​២០១៥​ (​ឡើង​តែម​ ២០២០)​ ពាក់​ផ្លាកក​លេខ​ បាត់ដំបង​ ១T-០៥៨១​ បើកបរ​ដោយ​ឈ្មោះ​ ផាត់​ រំភើយ​ ភេទ​ប្រុស​ ឣា​យុ​៣៧​ឆ្នាំ​ រស់នៅ​ភូមិ​រាម​គន់​ ឃុំ​គារ​ ស្រុក​មោងឫស្សី​ ខេត្តបាត់ដំបង​ ឌុ​ប​ស្ត្រី​ម្នាក់​ឈ្មោះ​ ចាន់​ លឿម​ ហៅ​ អ៊ុ​ អាយុ​៦៦​ឆ្នាំ​ រស់នៅ​ភូមិ​អំពិល​ឈូង​ ឃុំ​ឫស្សី​ក្រាំង​ ស្រុក​មោងឫស្សី​ ខេត្តបាត់ដំបង​ បាន​ធ្វើ​ដំណើរ​ពី​ទិស​ភ្នំពេញ​ឆ្ពោះទៅ​ទិស​បាត់ដំបង​។​

សមត្ថកិច្ច​បន្ត​ថា​ ពេល​បើក​មក​ដល់​ចំណុច​ខាងលើ​ ក៏​បាន​បុក​ដុំ​ថ្ម​ជើង​ទម្រ​បង្គោល​ឫស្សី​សម្រាប់​ចែក​គន្លង​ផ្លូវ​ ធ្វើ​ឲ្យ​បាក់​ខ្នង​ម៉ូតូ​ និង​កាំ​ម៉ូតូ​ខាង​មុខ​ (​កាំ​បន្ទះ​)​ រួច​ដួល​បោក​ទៅ​នឹង​ផ្លូវ​បណ្ដាល​ឲ្យ​ស្ត្រី​ជា​អ្នក​រួម​ដំណើរ​ស្លាប់​បាត់បង់​ជីវិត​ភ្លាមៗ​នៅ​កន្លែង​កើតហេតុ​ ចំណែក​ខ្លួន​ជា​អ្នកបើកបរ​រង​របួសស្រាល​ម្នាក់​។​

​ករ​ណី​នេះ​ កម្លាំង​នគរបាល​ស្រុក​បាន​ចុះ​ធ្វើការ​ត្រួតពិនិត្យ​និង​វាស់វែង​ ។​ ចំណែក​សាកសព​ជន​រង​គ្រោះ​ត្រូវ​បាន​ប្រគល់​ជូន​ក្រុម​គ្រួសារ​សព​យក​ទៅ​ធ្វើបុណ្យ​តាម​ប្រពៃណី​ ៕

មតិយោបល់